Mipui sawrkarin mipui a sâwr fu dawn em ni?
Lirtheiah road tax kan chawi tawh a, oil-ah road maintenance cess leh social infrastructure cess kan chawi leh dawn. Cess chi hnihah hian petrol/diesel lt. 1 zelah Rs 2 ve ve kan chawi ang.
Tax hi sawrkar sum hnar a ni a, a pawimawh em em a ni. Ram chhung ei leh bar, sum dinhmun (economy) enin tax hi sawrkarin a la ṭhin. Tax tihsan chang te, tihhniam changte a awm ṭhin.
Tuna kan ram dinhmun hi en ila, sum lengvak a tlem hle. Sum lengvak tlem chhan hi tam tak a awm thei ang. Kan ram ang, central sum min peka innghat tan chuan sawrkar hnathawk hlawh leh sawrkara sum che vel hi kan economy innghahna a ni lo thei lo. Kum 15 vel chhui kir ila, tun hun hi sum lengvak tlem ber hun a ni hial awm mang e tih theih turin sum lengvak a tlem. Hei hi sawkar sum lama a pachhiat vang a ni.
Sum lama sawrkar a pachhiat chuan ram chhunga chengte’n an tuar nghal ṭhin. A bikin sawrkar hna thawk ve lo, inhlawh chawp leh sumdawng tenau, eichawp zawngte tan chuan hum harsa tak a ni thin. Hetih lai hun hi sawrkarin sum a mamawh hun tak a ni ṭhin bawk si!
Hetiang huanah hian chhiah tihsan hi ram thenkhatah pawh a nghawng kan hmu tawh ṭhin. Nikum maiah pawh Sri Lanka-ah kan hmu a, an ram sum leh pai dinhmun a chhia a, Covid vangin an sum hmuhna ber Tourism lam an kalpui hleithei si lo. Oil leh thil dangah tax an tisang a, chu chuan mipui khawsak nasa takin a nghawng a, thil man a lo pung a, mipuite’n an tuar nasat em avangin an ramah buaina hial a chhuak a ni. An President chu ram danga a tlanchhiat hial a ngaih phah! Sri Lanka chauh lo pawh sawi tur a awm a ni.
Tun ṭuma sawrkarin VAT a tihsanna hi a tam lem lo va, a pawm theih viau. Cess chi hnih an lakah Rs 2 ve ve a la hi chu ti lo ngam se, mipui a nghawng na lutuk lovin a rinawm. Ram economy hi han chawi kang phawt se, tax leh cess te chu la tisang ang hmiang. Tun dinhmunah chuan ram economy a hniam deuh a ni. Taxation Minister-in press conference a neih khan petrol leh diesel aṭanga chhiah lak tharah hian vaibelchhe 96 vel hmuh an inbeisei niin a sawi a, mipui min rawk an tum a ni ber!
Tax lak san ai chuan an hlawh leh hamṭhatna dawnte tihniamin, nihna an vuah chawp CM adviser-te bakah consultant leh MoS rank-a an dah an party hotute, board chairman-te hlawh leh AMC leh LMC hlawhte hi tihniam leh rih ang hmiang. MLA hamṭhatna tihpunte hi tihniam teh se. Tun hun atan hian kalphung thar an sawi hi a ni dawn lawm ni?
Social media-ah kan hmu – minister-te bungalow cheina leh furniture atana hman sum zozaite kha han titlem ngam se ṭha. Speaker lirthei leite hi, an entitle vanga lirthei man to lei hi sum leh pai dinhmun enin thil zahthlak a ni. Bangla chei nan leh furniture lei nana sum hman zozai hi sawi mawi zel kan tum dawn em ni? Thil reng reng a man to to kan duh a, kan hamṭhatnate kan tipung a, hlawh kan san a, party hruaitute hlawh neia kan siam bakah, an hlawh kan tisang bawk a! Hei hi em ni kalphung thar chu ni ang?
Mipui sawrkarin mipuite a sâwr theih ang angah a sâwr dawn em ni?
- Lal Remruata