Tàn ina ka awmin mi kan si lo

Tun hnaiah Synod Prison Ministry chuan kan awmna lamah awareness campaign an rawn nei a; kan ngaihtuahnaa la awm ngai lo thil tam tak, an thil tawn hrang hrangte an rawn sawi. Jail tângte hian ngaihsaktu an lo mamawh khawp mai hi a lo ni. ‘Mi fel takte lam tura lo kal ka ni lo va, mi sualte zawk lam tura lo kal ka ni asin’ (Matt. 9:13) tih thuchah kha a hretu apiangte’n kan thawh zui tur a nih thu hi tun ṭum chu i ngaihtuah ho teh ang u.

Tute nge tâng

Jail tâng zawng zawng hi mi sual an lo ni vek lo tawp mai; dik lo taka puhchhiatna tawkte pawh an lo tel hi a lo ni. Sualna chi hrang hrang avanga tangte pawh hi chhan ṭha tak nei an lo ni fur mai bawk. Mi sual hlawm tawp hi tu mah an lo awm tak tak lo, an thinlung chhungrilah chuan ṭhatna kawng zawh ve hi an duh vek; sualin a bawh beh laklawh, ‘Ka duh loh zawng chu ka ti ṭhin’ titute an ni ve tho asin.

Tlawhtu nei lo tâng vâkvai

Jail tâng zingah hian chhungte mumal nei lo te, an chhungte retheih lutuk avanga jail panna tur takngial pawh nei lote an awm a. An mamawh–ha nawhna, sahbawn, thawmhnaw ilo petu nei ve lo an awm ṭeuh mai. An tânpuite’n an theih ang angin an ṭanpui ṭhin; engtik lai pawha ṭanpuina pek chu an thei reng bik si lo. Dinhmun khawngaihthlak taka ding hi jail tângte zingah hian an lo tam khawp asin.

Chhungte tuithlâr tâng vâkvai

Tân ina an awm laia thi, an ruang hlâwmtu nei lo an awm nual tawh. Jai tâng zingah hian an chhungte’n an tuithlâr ṭhak hi an awm nuk mai. Jail aṭangin lo chhuak pawh ni se, innghahna tur pawh nei lote an awm. Awareness campaign rawn neitu pakhatin a sawi chu, hmanni lawka jail aṭanga chhuak kha mi verandah hnuaiah a lo riak mai mai, tih thu a sawi. Chutiang mite tan chuan an kawng hi a ping teh mai asin; kawng ṭha an zawh zui a beiseiawm loh khawp mai. An chhungte nena inkar ṭha an neih theih nana hma latu mamawh pawh tam tak an awm.

Rilru lam doctor mamawh

Jail tâng zingah convict an nih chiah khan, an tân hun tur kum 10 laite a nih phei chuan rilru buai tak tak, an tân chhunga an nupui/pasal fanaute awm dan tur ngaihtuah hah vanga dam man awm tawh lo nia inngai, mahni nunna la duh mai an awm ṭhin. Chung mite chu an jail tânpuite’n zanahte an ven ngai khawpa rilru buaite an awm ṭhin. Kan hriat phak ve loh nun hrehawm nei hi an va tam em!

Jail-ah piantharna chang an awm

Jail-ah hian rawngbawltu chi hrang hrang, Set Free Ministry te, Synod Prison Ministry-te leh rawngbawltu hrang hrangte’n rawngbawlna an nei ṭhin. Chung mite rawngbawlna avanga piantharna chang, nun inthlak hlawk pawh eng emaw zat an awm tawh. Rawngbawltute’n an sawi chu, sorkarin Pathian thu kan hrilh theih nan enkawlna an lo pe a, min khalh khawmsak sa Pathian thua châwmna remchang tak a awm hi kan vannei hle a ni, an ti. Heng an rawngbawlnaa piangtharte hi jail an chhuahsan hnu pawhin jail chhunga rawngbawl ṭhin tam tak an awm tawh.

Ngaihsaktu an mamawh

Jail tângte hi mipuiin kan ngaihdan kan thlak a ngai tak zet. Rûkru, tualthat, jail tâng lo chhuakte hi jail-ah eng nun danglamna nge an dawn tih kan hre lo a, mi sual tâng chhuak chu kan lo ṭih hru zel mai. Kan sawi tawh ang khan, an tân laiin piantharna ṭha takte an chang ve a, an lo chhuak a, ngaihsaktu hmel an hmu lo fo. Mi sual treat-in kan lo treat a, khawtlangah an tuitla lo va, an piantharna pawh thlarau lama châwmtu an hmuhzui loh avangin nun suala tlûk luh leh a awl ṭhin. Ngaihsaktu dawng ṭhate erawh chu rawngbawltu pawimawh tak ni zuite an awm ṭhin asin.

I felna kha khawiah nge?

Felna rah chhuak tur awm lo, mi fel sawmkua leh pakua aiin, mi sual pakhat sim chungah vana mi an lawm zawk titu kan Lal Isua khan, tehna bûklung a hûn hi inteh nan i hmang ang u. Kan ṭhatna hi mi sualte ngaitheilo ṭhatna a nih phei chuan, kan lan mawina ngawt hi chhuan tlak a awm bik lo ang. Mi sualte ina thleng ṭhin Lal Isua kha felna chapopui Pharisai-te kha a ei lo teh mai a nia. Chung lam khian kan felna kan chhuan ai mahin, mi sual simte hi mark a lo pe sang zawk mai thei a ni.

- Lalrinliana Colney