Kan kût neih chhun ni ta a riang mang e
Chapchar Kût kan hmang ta a, Mizote kût pawimawh ber ni ṭhin hi tunah chuan kan kût neih chhun a ni ta. Mim Kût leh Pawl Kût-te hi kan hmang ngai tawh lo a, Ṭhalfavang Kûtte chu phuahcawp a ni.
Anthurium Festival phei chu tun hnaia phuahchawp a ni a, tunlaia Mizote kût neih chhun chu Chapchar Kût a ni.
Kan kûtah hian Mizo kan zawng a, kan zawng hmu zo ta mang lo; Mizo thinlung hi a na ṭhin a ni. Kût hi khawtlangin hlim takin an hmang ṭhin a, chu chu kan thei tawh lo. Sorkar leh YMA koh khawm chawp kan ngaih tawh avangin kan kût hmasa kha chu a bo vek tawh.
Chapchar Kût hi chu chhung tin hian hmang ila, kan neih angin sa hmeh hram tum ila, he mi kar hi chuan Chawlhni Sa nghei maiin Kût sa ei tum ta zawk ila, kan kût hian Mizo chhungkua a fan thei ang.
Tunah chuan Anthurium Festival-a zaite tho kha Lammualah an zai a, Ṭhalfavang Kût-a lamte kha an lam leh a, a ṭhente chu KṬP General Conference lama zaite an ni a, an zaina hmun a dang a ni mai a, an hla sak a la inang deuh vek bawk si a, kan Mizo kût hi punkhawm naranah kan chhuah zo ta. Tunah hi chuan kan Chapchar Kût, Mizote kût neih chhun chu zaithiamte inphochhuahna hunah kan hmang ta. Hei hian ka rilru a tinâ viau a ni.
Hmun khatah kan hmang dawn a nih pawhin kum 70 chung lam ṭhutna huangte siam ila, Mizo inchei dan dik taka incheiin rawn kal ve dam dam se, naupang awmna huangte siam leh ta ila, awmzia a neih deuh ka ring a. Zu rui leh drugs rui leh naupang inawm pawlh vekte kha a him lo a, kum upa kal awm chhunte kha an khawngaihthlak bawk. Mi zawng zawng huap, ṭhalai huau huau lawm punkhawmna mai ni loah kan Mizo kût hi kan chhuah leh a ngai.
Zai hi tunlai ṭhangtharte ṭawng takin a 'tam over' lutuk a, ziaktu hmasate ziah angin concert a ni ta ber a, Mizo nun ze mawi bo ṭhakin an Saplam ang nghawng nghawng a, Mizo zai, Vanlalhlana leh KC Runremsangi-te an chetna ṭhin chheih zai bak hi chu seng lut vak tawh lo ang u. Zaia lamna tur chu concert a tam a, Chapchar Kut chu Mizote kut a ni tlat.
Tuna kan hman danah hi chuan Mizo kutah Mizo zia a lang lo a, tunlai ṭhangthar hlimhlawp leh concert zia chiah ka hmu.