Mizoramah hmeichhiate kan him lo!

Khawvel chang­kanna mila kan kal ve mek lai hian hman aṭanga kan lo chin tawh, kan la paih bo theih loh chu sexual harassment/ hmeichhiate auh nawm­nah hi a ni. Eng­tik lai aṭang khan nge Mizo mipate hian an lo chin ṭan ang aw?

Sexual harassment hi ram changkangah pawh a thleng fo a, tunah pawh a la thleng mek reng a. Ram chang­kangah te chuan dan a lal em em a, mi an fing a, hmeichhe chhaih nawmnah chingte chu danin a hrem mai ṭhin.

Pawi em em mai chu hetianga hmei­chhiate chhaih nawm­nah chingte ti pawng­pawrh ngam tur hian kan society hian hmeichhiate min hum lo leh min dah hniam lutuk hi a ni a, Mizo mipuite kan ṭhanharh a ṭul tak zet tawh a ni.

Hnam fing leh changkang apiangin hmeichhiate zah leh dimdawih nachang an hria a ni. Mizo mipa fel leh zahawm bawk si an awm ṭeuh tawh laiin ṭhenkhat chu mawl leh sual tak tak, hmeichhe pawi sawi lo kawng kal lai zahmawh leh ṭawngkam tuihnai lo tak taka lo au nawmnah ching an la kat fur mai a, hei hian Mizo mipate a ti hmaibal ngawt mai.

Zirna avang leh thil dang dang avangin Zoram pawnah te ka awm ve fo a, sexual harassment hi ka huat em vang nge pawh ka hre lo, ka tawk ngun em em a ni. Hetiang thil duhawm lo ka tawh chang hian ka en liam mai mai ngai lo. Ka hauh hrep bakah, pi te, nu te ni leh farnu te in nei ve ngei ang a, tuna ka chunga in tih ang hian mipa dangin ti ve ta se, in lungawi ang em? ka ti kher ṭhin.

Mizoramah ve thung chuan a tuartu hmeichhiate chhan a hnekin hmeichhia te te a van zak thei lo, a huai reuh hle mai, ben nik tur tih te leh ṭawngkam mawi lo tak takin min vawm zui nek zawk ṭhin. Hetiang a nih avang hian mipui punkhawmnaah te hian ka kal hreh ṭhin khawp mai. Kan rama thil do rau rauah do hahthlak ber pawl niin ka hria.

Chhaih nawmnah ka tawh zawng zawng chu ziah vek sen pawh a ni lo vang. A pawi ber chu hmeichhiaten chhaih nawmnah kan tawh changa chhantu leh thlavang hauhtu kan nei lo ṭhin hi a ni. Mahse, hetiang ka tawh changa ka lo bei let ve ṭhin hi keima tan chauh ni loin, ka hmeichhiat pui zawng zawngte tana ka beih let ve naah ka ngai a ni.

India danpui hian hmeichhiate a hum­halh ṭha em em a, kan hmeichhiat puiten chhaih nawmnah an tuar a nih chuan zam mai loin ṭanpui vat ṭhin ang u. He kan ramah hian thlamuang taka kan awm ve a hun tawh a ni.

Kan ram a lo chang­kan a, hetiang thil ṭha lo tak tih ching ṭhin kan Mizo mipaten an sim hun hi Mizorama cheng hmeichhiate hian nghakhlel takin kan lo thlir reng e.