Sikul kan Ṭan hma ta

Sawrkar thu chhuak angin zing dar riatah sikul kan ṭan ve thei ta e. Naupang lam aṭangin harsatna a awm em emin a lang lo. An phur ngaiin an la phur reng nite pawhin a lang. Chutih laiin eng pawl emaw chuan sikul ṭan hma duh loin harsatna eng eng emaw an lo siam ve thung a!

Zirlaite hmakhua ngai zawk tur ni awm tak khan, zirlaite zirna tikhawlhkham zawngin chet an chhuah tlat a. Heti anga zirlai naupang rilru thianghlim tak mai ti phawklek zawnga tha an thawh ta mai hi a zia lo angreng khawp mai. Sawrkar chungah an lungawi lo a nih pawhin sawrkar chungah lungawi lohna lantir mai se; sikul naupang sikul kai tur dang kher lo hian.

Tu tuten emaw mahni ṭanghma chauh ngaihtuahin sikul ṭan hma an thlawp loh thu an lo au chhuahpui ve mek bawk a. Sikul ṭan hma ṭha titute chu mi hawi zim leh mahni chauh inngaihtuahah min chhuah zawk titih hlauh bawk! A ṭhat lohzia leh kan tlin lohzia hre tur pawhin thla khat em pawh kan la kalpui lo a nia. Buana hmaa lo kher nghal ringawt hi a dawizepthlak ka ti.

Zirtirtute pawhin an tlin loh thu an la auchhuahpui em hleinem; naupangte phei chuan nuam an ti zawk emaw tih mai tur a ni. Mizorama zirtirtu pawl pali phei chuan, tih hlawhtlin a nih theih nana ṭan lak tumin thuchhuah an siam zawk a nih kha (Vanglaini 8/4/2015). Chutih laia keini’n lo tlin loh ve nghal ringawt hi a buanchak lo hna emai! A englai ber hi nge maw kan sawisela kan duh loh viau chhan le? Sawrkarin kalphung a thlak danglam hi kan dodal ve hrim hrim emni zawk?!

Zirtirtute phei chuan tlin loh sawi ngam tur an niin ka hre lo; zirtirtu hna awmzia an hre chiang a nih phawt chuan. Zirtirtu hna hi khawvela hna ropui ber pawla chhiar tel a ni. Tlawmngaihna leh inpekna, rawngbawlna rilru pua thawh chi a ni. Chuti ang rilru pua thawk thei lo tan chuan thawh loh ngam mai a ṭha.

Naupangte hmakhaw ngai chung leh ram hmangaihna rilru pu chunga thawh a ngai. Nu leh pate pawh hian tlin lo inti ngam tur kan ni lo. Kan fate leh a zirtirtute mahin an tlin a hnu, theihtawp chhuah ve mai tur kan ni. Tun anga kan kal renga kum hnih khat a liam leh meuh chuan, zing dar 5:30-a thawh chu dan pangngaiah kan neih ang. Zing dar 7:30 vela thawh hi dan pangngaiah kan neih ṭanin a lang - a zahthlak angreng khawp mai.

Ṭhalaite hi zing ni chhuah aṭanga darkar hnih hnu velah pawh kaihthawh theih kan ni tawh mang lo! Ṭul lem loah rei tak tak kan meng a, hnathawh hun tur a tih khawvar hnuah kan mu leh burh burh si.

Khawthlang vaiho pawhin an tih theih tithei ve lo tura kan inngaih tlatna rilru hi kan paih phawt loh chuan ram changkang kan ni thei ngai lo ang. Sikul kan ṭan hma chhan chu engvang pawh lo ni se, kan zirnain a chhiat phah lo a, engemaw talin a lo ṭhatpui dawn phawt chuan engnge pawi? Hmasawnna kai rual thei ang ber kan duh bawk a, eng nen pawh lo inkungkaih se, a ṭha zawng a nih phawt chuan a ṭha a ni mai lo’m ni? Mahse, kan zirnain a chhiatpui si chuan a dik lo ang.

Mi tam takin, ‘Kan fate sikul an ban hma chuan engnge an tih ang?’ tia an buaina hi, kei chu ka lawmna a ni tlat! Keini ang mirethei, awmpui hlawh pek tur nei ve zo lo tan hlei hlei hian a van ṭha dawn em. Sikul an ban hma chuan, eirawngbawl, insuk, in leh a vel tih faiah nu leh pate min pui thei tawh ang. Inhlawhfaa chhuak nileng ṭhinte pawh haw veleha zanriah rel chawp chung chung ngai loin kan fate’n an lo ti ve hman tawh ang a, mi ^k rualin kan ^k ve thei tawh ang. Kan fate tihtur kawhhmuh leh khuahkhirh hi kan ko a ni - an zirtirtute tihtir vek tum hi a fel lo.

Chutih rualin, hetia sikul an ṭan hma hian thil ngaihtuah fel ngai deuh mai pakhat a awm - bus services. Hmun ṭhenkhatah a tam kan tih viau laiin ṭhenkhatah chuan a khat pharh mai; a bikin Aizawl tlak lamah. A chang chuan darkar chanve chuangte nghah a ngai! Hetiang reng a nih chuan kan fate hian sikul an tlai fo ang a, hrem an tawk fo ang tih a hlauhawm. Kan kalphung thar hi mipuite pawhin tlin lo kan inti thuai mai ang. Chuvang chuan hei erawh hi chu ngaihtuah fel ran a ngai. Minute 15 danah tal hian bus tlan hi awm reng thei se a ṭha khawp ang.