Kawng sira motor park hi
Tun hnai khan GAD chuan Mizoram Secretariat panna kawngpui sira motor zan riaka dahteah lehkha tarin, dah tawh lo turin an ti a. Lirthei neitute chuan an lirthei an seng bo ta duak mai a, a thawventhlak hle.
Lirthei neitu tam tak chuan garage nei hauh loin an lei tih a chiang hle mai. Heng ho hian engtin nge local council aṭangin garage nei anga lehkha an lak a, LC-te pawhin garage nei angin engtin nge lehkha an pek theih ni? A mak ṭhin ngawt mai. Garage nei lo na nâ nâ chu lehkha pek awm loh tak a ni a. LC ṭhenkhat hi chu an fair lo hle tih a lang reng mai.
Veng ṭhenkhatah pawh LC-te’n an veng kawngpui sirah lirthei man chawiin an riahtir a, heng ho hi kawng tichêptu an ni a, an hnawk khawp mai. LC-te hi anmahni vengah thu viau mah se, kawngpui sirah garage nei lo an park tir a, pawisa an lo khawn ve ngawt hi a dik lo.
Eng pawh ni se, garage nei lo na nâ nâ chuan lirthei nei lo ngam mai rawh se. Kawngpui sira cheng nuai tel man han dah ngam ngawt mai pawh hi a dikin a dik lo hrim hrim. Heng ho lakah hian misual an che lem lo a, an la vannei mai mai a ni. Misual ho hian sual rawngbawl se tihna ni loin, an chet hunah chuan an ṭhangharh ve mahna.
Aizawlah chuan thil pawimawh tih dawn chuan local council lehkha a ngai zel a, chutihlai chuan kan LC-te hi political party behchhan an ni ve tho a, politics a tel tawh chuan rin ngam an har deuh tlangpui mai. Tribal certificate, etc. lak dawnte hian LC lehkha a ngai zel a, dik lo deuha lo ti pawh LC zingah an awm thei tlat. Chuvangin, YMA hi an dik deuh berah mipui vantlang chuan an ngai hial a nih hi.
Eng pawh chu ni se, kawng kama lirthei dah, zan riaka dah ho hian kawng an tichêp em em. Engtia tihrêm tur nge tih erawh hriatthiam a har khawp mai. Lirthei an duh ve si a, a dahna tur garage leh si lo. Garage nei reng reng lote pawhin motor an register thei a nih chuan LC-te'n dik lo taka lehkha an pek vang a ni tih a chiang. Lirthei leitu leh neitute ai chuan LC-te an demawm zawmah ta zawk a ni. Veng tin LC-te hi an fimkhur a ngai a, dik taka lehkha pe tur an ni a, an dik loh vangin kawngpui a chêp a ni ta ber mai e.
- Lal Rinmawia