GOOD MORNING

Sawrkarin hun rei tak aṭanga a lo ruahman leh sawi lawk angin zing dar 8 ah naupang sikul kan ṭan ta, a va han lawmawm em! Sikul ṭan ni aṭangin zoram chu zingah a tho a, a insingsa a, a hmuhnawm ngei mai. Dar 7 emaw 7:30 emaw ka rawt ang kha ni phei sela chuan hei aiin a hmuhnawm lehzual ang. Kan Aizawl khawpui, zingkar awm lohna khawpui ni mai tawh tur kha chhan chhuahin a awm ta, hei zet zawngin kan khawpui zing mu a kaitho a ni ngawt e. Zing naran ni lo, hnathawh bul ṭanna zing ṭha a lo her chhuak dawn ta. School naupangte sikul kai tur zing takah an thelh ta sung sung mai le! Kan fate chhuah tawh hnuah mut ṭhat leh thu awm ta lo chu, puitling pawhin zing kara hna thawh tur kan zawng ṭan ruai ruai mai chu a nih hi mawle, a va han ṭha tehlul em. Zing thawh hma hi Thingtlang lam tan pawh a pawi lo turah ngai ila, anni lam tan phei chuan tihdan pangngai a ni zawk mah awm e.

Kan hun tawn mil tura mihring inruahman leh inbuat­saihna chang hriat hi mi pangngai tihtur a ni reng a ni. Hmanlai deuh, mihausa deuh chauhin chawlhni zinga vawksa chhum an ei phak lai rilru paihna chang hre lo tan chuan, vawksa chhum ei nasat luattuk avanga thisen sang leh zunthlum vei chur chur mai loh chu kawng dang va awm suh! Tunah phei chuan vawksa ser khat mai maite chu a duh duhin chawei apiangin ei dawn pawh ni ila, khawpuiah chuan kan thei a ni titih reng tawh mai si a. Vawksa leia chhum ṭawk ṭawk thei nih hi mihausa entirna emaw, intihtheihna chi emaw a ni tawh lo va, ei lo tura insum thei hi mi changkang leh hausa entirna a ni tawh mah zawk tihna a nih chu.

Eng dang a ni lo va, hun a danglam ta a ni mai, ei aiin ei loh, lei aiin lei loh hun a thleng ta a ni ber mai. Vawksa a ni emaw, Bawngsa a ni emaw, eng sa pawh ni rawhse, a sa tlem deuh, pawlhdaltu tam deuhva siamna chang kan hre ṭan. A chhuma chhum tawp ni lo deuh, bawlhlo hrang hrang, food processing company pangngaite'n an siam chawhmeha pawlh tur chi te nena chawhmeh kan rim pawh hre viai viain ka inhria e a!

Mai, Maipawl, Iskut, zik­hlum ei peih lo tlangpui Mizo hnam hian, a hang apiang, a al leh a thak apiang um mai lova, a da deuh, a dal deuh lam eina chang pawh kan hre dawn hnai a ang ta. A tui lo zawk pawh ni se a ṭha zawk a nih chuan thil hel-ei te pawh kan uar dawn ṭan niin a hriat theih ta hial mai. Ni e, thil hel ei tamte hian ti sen a siam a, hmel a tiṭha an ti, vantlang chung lama lengte chauh ni lovin, a mimir hian taksa tana ṭha eia in i uar ang u. Kan lo hrisel ang a, kan awmkhawm lai vedeo thlalak te pawh a en a lo hahdam deuh deuh dawn nia.

Hetia naupangho sikul an ṭan hma takah chuan kan tihmakmawh pakhat chu 'chawchhun' (Hmana ka thuziakah khan 'chhun chaw' tiin ka ziak a. Mahse, Vangtlanga kan zirtirtu hlun (ka Guru), ka ṭhianpa ni bawk Pu F. Robuanga'n 'chawchhun' tihtur a rawn ti a, chawchhun ka ti ta a ni) ngaihpawimawh hi a ni awm e. Chawchhun ei hun chungchanga ka ngaih­tuah vang hian a nia, dar 8 aia dar 7 ka tih ṭang ṭangna chhan pakhat chu. Dar 6 vela breakfast eia, dar 1 vela chawchhun eia, tlai lam dar 9 vela tlai chaw ei hi ṭha ka la ti ber. Kan sports mite tana a ṭhatna tur, kan hriselna atana a ṭhatna leh international schedule a nihzia lam chu sawi tawh lo mai i la. Chawchhun mumal taka kan ei chuan kan taksa a lo hriselin, kan lo chak zual ngei ang. Kan chawei leh chawei inkar hun kar zau hleih dan chu hmanah ka ziak tawh kha. Kan zin veivahnaah pawh harsatna kan tawk tlem deuh ngei ang. Mizote ram pawna kan zina kan harsatna inṭawm tlanglawn em em mai chu 'rilṭam' hi a ni hial awm e. Kan chawei hunin rual a pawl lo tlat hi kawng hrang hrangin a pawi em em a ni.

Mi te'n hnathawk tura inbuatsaihna hun leh, hna bul ṭan huna atana an hman 'ZING' hun ṭha theuleuna hun leh, bazar hun emaw kan ti hlauh mai te hi, he rilru hi thlak danglam theih ni se ka ti hle ṭhin mai. Ramdang, hmun danga mipui mimir nunphung nia lang chu, zing lamah hnathawk tura inbuatsaihin, hna lamah an chhuak chur chur a, tlailam hi Bazar leh chhuah vah-na hunah an hmang deuh niin a hriat theih. Keiniho hian zing hi bazar hun, ṭhenrual tlawh hun, len hun emaw kan ti deuh tlat niin a lang thung. Kan hnamin 'theuleu' rilru nena ni bul kan ṭan hi a ṭha lo. 'Hna' hian ni bul ṭanve ila, 'len ' leh 'bazar' te chu kan hman tak leh tlailamah ni ve se la, hna hi i dah hmasa ve ang u. Thawkrimte chhuah vah nan leh bazar nan kan bazarte hi inhawng rei deuh bawk sela. Ram a buai tawh si lo va, sipai an hlauhawm tawh hek lo, thim lah a eng zo tawh si. Eng pawh ni se, sikul ṭan hmaa zarah zing hman dan kan thiam ṭan ta, zoram tan zing ṭha (Good morning) a her chhuak dawn tak tak ta niin a lang e!