Kan sa zuartute em em hi!
Mizote hi vawksa ei hnam kan ni a, vawksa chang lo bawngsa leh arsa thlengin kan ei nasa hle a, vawksa ngat phei chu tual vawk a nih ngat phei chuan zing karah a zo duak ṭhin.
Heti khawpa sa duh hnam kan nih lai hian vawksa leh bawngsa zuartute hi erawh chuan mipui min zah thlawt lo a ni. Sa kan lei dawnin kan duhlai kan kawh sir deuh min pe ṭalh ṭhin a, hei hian mipui min zah lohzia a tilang chiang em em a ni. Hetiang em ema in zahlohna hi state dangah a awm ngai ka hre lo.
Vaiho sa zawrh hi ka lei ve fo a, kan duh lai chiah min pe ṭhin.
Bawksa emaw, vawksa emaw kan lei hian kg khatah pava chanve emaw tal chu ei tlak loh min pe ru tel ziah. Sa an sah hian a ṭha lai min hmuhtir a, a rukin sa chhia min pe ru thiam em em a ni. Sa man a to tulh tulh a, a sat tute'n an sat thiam tulh tulh bawk a. Lungawi zan si loin sa kan ei ve duh si avangin lungawi awm takin kan lei a ngai ta fo mai.
Mizo sazuar tam zawk hian ti em ema mipui min zah lo hi tihreh a ngai a ni. A buk lah an thiam em em khawp a, rang takin buk tling fe angin an khai chang a awm a, buk ṭha leh ta ila a tling chang chang emaw, a tling lo lam hret emaw a ni fo.
Sa kan lei reng rengin sa ṭha lai kan lei hi kan chanvo a ni tih sazuarte hian an hre ta lo hle mai. Hei hi eng department enfiah tur nge ni ang. Trade & Commerce nge Legal Metrology department hmalakna tur nge ni ang le.
Sa buk tling lo te, mahni duhlai ngei lei lo a, kan kawh sir deuh min pe lui hram ṭhin te, a rate lah an duh duha an chhiar angte hi kan sorkar hotute hian ngaihven teh se.
Sa ṭha lei tur sa chhia min pe tel lui ṭalh hi ka pai dai thei ngang tawh lo. Chuvangin, kan sa zuarte pawh hian anmahni dawrtute lungawina ngeiin sa hi sat tawh ṭhin se a duhawm khawp mai. A zuartu aiin a leitu hi kan Lal zawk tih hre nawn hram teh se.