Ruahtui khawl dan min hrilh r'u

Mi thiam tak takte hian ruahtui khawl ṭulzia an sawi chamchi a. Ruahtui khawl nachang kan hriat loh avanga tuia harsatna tawk leh si ṭhin nia min chhal hian ṭhenkhatte phei hi chuan Mizo chhungkaw tinte hi min hau hrep ṭhin ni ber hian a hriat ṭhin. Vawi tam tak ka ngaihtuah hnu pawh hian kum khat tla tur emaw, ṭhâl laia tuia kan buai loh deuhna tur khawp ruahtui khawl dan tur hi ka hre chhuak zo ngang lo.

Mizoram, a bik takin tui indaih lohna leh harsatna hmun Aizawlah hian in insi khupin kan khawsa a, in pakhatah chhungkaw eng emaw zat kan cheng a ni. Kar hnih khat tla tur tui dahna tur hi chu chêp tak leh rem lo chung pawhin chhung tin hian kan dah hram hram hlawm. Ṭhenkhat thla hnih khat daih dahna nei pawh an awm ang. Kan tuizemah fûr lai na nâ nâ chuan harsa deuh chung leh buaithlak deuh pawhin ruahtui chu lo dah lut thei pawh ni ila, rei hman daih a ni chuang si lo.

Hun rei tak daih tur tuizem dahna tur hmun lah kan nei lo ṭheuh mai si. Lei hnuaiah tuizem lian deuh nei turin chhung tin tan a ngaihna a awm si lo. In chung zawl nei zau deuhte hian an in chung khatin tuizem dah rawh se, an ti nge, an in chung chu tuizemah siam rawh se, an ti zawk ni ang aw? Chhung tin hian in chung zawl zau deuh kan nei vek si lo, a nei pawhin tuizema tihkhah vek chi a ni ngawt si lo. Engtia han khawl tur chu ni ang maw? Ka va buai em!

Ruahtui khawltu tur leh khawl thei ber tur chu sawrkar hi niin ka hria. Aizawl dai hnai deuh leh hla deuh, chhim leh hmar, chhak leh thlanga awm, hmun ruam âwl lai la awm apiang, kawrte tuiin a fin theih zawng zawng hi nasa takin, a zau thei ang berin khuap li thleh thluah se la, ṭhâl tui van hunah mipui hnenah sem se la, kan ziaawm deuh mahna. Chu chu a kawng awm chhun ni berin ka hria. Chutiang tur deuh chu sawrkar hian hmun hnih khatah buaipui tlatin ka hria, ka hresual mai thei bawk.

Mi hausa ṭhenkhat, in leh lo nei leh hmunhma nei ṭha mi tlemtête chuan fur ruahtui emaw, ruahtui lo emaw, kum hnih khat tla tur dahna nei chu an awm mahna. Nimahsela, Zoram mipui zawng zawng, a bikin Aizawla mi 90% chuang hi chu chutiang ti thei dinhmuna ding kan ni lo tih hi kan mithiamho hian an hre tho awm si. Engtia khawl tur chuan nge min tih tak ang le?

Ruahtui khawl nachang kan hriat loh vanga mipui min hau ṭhintute khan ruahtui khawl dan min han hrilh u la; kan theih ang angin zawm kan lo tum dawn nia.

- K Hmingthankaia