Mizoram Congress party hmabak hi a thim nge a êng?

Rahul-a hnuaiah Indian National Congress hrim hrim hi chu I.N.D.I.A anga thawhhona emaw tal chuan a la sawrkar a rinawm. Rahul-a lah a la upa lo a, mipuiah tla na tawlh tawlh niin a lang bawk.

Mahse, chu ringawt chu Mizoramah Congress party hian an thawh chhuahpui kher lo thei. India ram zau zawk kan en chuan state tam takah UPA anga Congress an sawrkar lai emaw, a hma deuh PV Nahasimha Rao-a hun laia an sawrkar emaw pawh ni se, state-a Congress party tho chhuak ta lo hi an tam mai. State ṭhenkhatah hian tualṭo party lian pahnih inbeihna ni chho ta reng, regional party ṭha deuh, national party ngam loh reng hi an awm nual.

Bihar pawh independence tirh lamah Congress an chak ngei, kum 1990 chin hnu lamah chuan RJD–Laloo-a te an lo lang a, Laloo te hun a liam pawhin JDU–Nitish Kumar te an ni ta reng mai. National party hlun Congress chu an sawrkar lo rei tawh hle a ni.

West Bengal pawh chu ti tho; independence tirh lamah Congress lang mah se, Joyti Basu-a ten kum 20 têl ro an rel hnuah Mamata te an lo lang a, Congress lal tik ni a awm ta lo. Tamil Nadu pawh AIADMK–Jayalalitha te awm loh hnu thleng pawhin Congress lam chu awm lo ang an ni. UP-ahte pawh Mulam Singh Yadav leh Akhilesh-a te, an pafa an lal loh leh Mayawati (BSP) te. Anni thuneih loh hnu pawhin tunah BJP an ni. Hetiang state hi a awm nuk mai.

Tunah hian kum 2028 inthlan hma zawng kum 10 chu Congress hi opposition dawn chiang tawh a. MNF kum 5 an opposition lain, an ni kum 10 an hmang dawn. Chutah tuna an OB-te hian an sawrkarpui theih in ring em? An theih lohna percentage hi sang tak a ni hrih, tunah chuan. Insiamṭhatna hun erawh an nei nual a, an inseamṭhat loh erawh chuan kum 15 opposition hi chu belchhung sa a ni mai. Chutih hunah meuh chuan PC party anga zuih ral a har tawh lo vang.

An hruaitu hmasa Pu Hawla anga leader ṭha kha an neih a ngai. Tuna an President hi kum 2023 inthlan affidavit-a a lan danin kum 74 ni a, kum 2028 tawp inthlanah chuan 80 a lo ni chho mai dawn. Zoram puma zin kual tur chuan a kum a tam ṭan a, zin ringawt pawh a ni lo, auhla (slogan) leh policy mipui ei zawng an zin chhuahpui tel a ngai. Chumi pahnih thila President zin taima tura fit ṭha leh policy mipui hîp zawng chu tunah an nei lo ve ve niin a lang.

ZPM khan Leader a hranin an nei a, President leh Working President nen. An zin taima a; an slogan pui ber ‘Kalphung thar’ kha mipuiin test an châk. Chuvang chuan inthlan hma aṭangin municipal-ah emaw, VC leh LC by-election a ni emaw, candidate an set sual thei tawh lo. ZPM ticket hûm apiang an tling a ni ber.

Kum 2008-a Congress sawrkar dawn khan Pu Hawla kha a zin nasa hle niin an sawi. Tun ṭuma Pu Duha CM tur pawh kha a thawk rim a, a zin nasa. Pu Hawla kha Kolkata aṭanga a lo hawte hi Zarkawta an in lut lova chhim lam kaltlang nghalte kha a ngah hle a ni awm e. NLUP ṭha mi–cheng nuai khat kha party dangte pawhin inthlan hma fe aṭangin an chai laih laih tawh. Khatih hun laia media lama lar leh hlun Zotalk, Pu Sangzela Tlau programme-ahte khan an chai laih laih. Tuna CM ta Pu Duha te hian in tinah nuai khat sem a theih an rin loh thu an sawi. Tuna Agri Minister hian, "Lo sawrkar ta ula, engtik hun chhungin nge in sem theih ang," tiin a zawhna video clip pawh a awm kha. Congress party policy kha mi titi ber a ni tlat. Tun inthlan zawh taka ZPM Kalphung Thar mi titi ber a ni ang chiah khan.

Khatiang tak kha tunah ni leh nghal thei lo mah se, party lian pathum zinga inthlan apianga hniam taka 3-na aṭang hian an tâl chhuah vat a ngai. Party an inthlang thar a, inseamṭhat pawh an tum ve viau hmel. Vice President an ruat thar nual. An MLA neih chhun an dah hi chu a awm viau, a dang pahnihte hi chu mipui hîp chi an ni lo. Party mi hlun leh mi hlui lamah eng emaw ṭangkaina an lo nei a nih chuan thuhran.

Chuvang chuan, kum 2028 inthlan hmachhawn tur chuan

‘change’ an mamawh. Party inthlan leh ti dawn se la, buaina a tam a, a hautak hmel si a, an ngam tawh kher lo vang. Inthlang lova anmahni hi a ṭangkai thei ang bera an theihna inhman chhuah sak tura an inpumkhat theihna atan anmahni leh anmahni hi ṭan rual an mamawh niin a lang. A nih loh chuan rial anga ruh tak chunga ral a ni mai.

- Hruaia Kawlni