Khawiah nge hlimna?

Mi tam tak chuan hausak, lar leh mite hriathlawh nih hi hlimnaah ngaiin chu lam hawi chuan theih tawpin kan tlan a. Mahse chutiang chu hlimna min pe theitu an lo ni hauh lo mai.

Khawchhak thliin na takin kan ṭhalaite a nuai a, an inchei dan leh nun phung tam tak kan zawm a ni. Khawchhak lam mi lar leh hausa, hlim si lo, a tawpa mahni in tihlumte chanchin leh a thusawi tlemte han ziah ka tum a ni.

"Engkim mai hi engmah lo mai a ni, tunah hian ka hriat ngai loh kawng chu zawhin ka kal mek a ni" tih a web site-a a ziah hnu rei loteah South Korean lemchan thiam, zaithiam leh chham mi (rapper), lam thiam em em nula tam takin amah ang nih an chak leh mipa tam tak thinlung luahtu ni bawk Heo Yun (U;Nee tia hriat lar) chuan January 21, 2007 -ah a chennain Seo-gu, Incheon, South Korea-ah mahni kut zalah a nunna la a hmuh a ni.

Model lar Kim Ji-hoo, hmeichhe tam takin an atchilh chuan a chenna Jamsil, southern Seoul-ah a nunna ama kut zalah bawk lain hmuh a ni. A in tihhlum hma lawk hian, "Hringnun hi thli thaw ang mai chauh a ni a. In tawhkhawm hi hlimawm viau thin mah se inṭhen erawh a lungchhiat thlak tak meuh a ni. Engkim mai hi hun reilote chhung atan mai a ni" tiin a web site-ah thu a ziak.

South Korean model lar leh hmel ṭha, Kim Yuri chuan kum 21 mi chauh a nihin a hring nun a titawp. Korean fashion model leh lemchan thiam, Woo Seung-yeon chu kum 24 mi chauh niin a in tihlum bawk. Lee Eun-Ju, Jeong Da-bin leh midang tam tak sawi tur an awm a, kan sawi seng lo.

Hemi chin ringawt aṭang pawhin hlawh­tlin, lar, sum leh pai ngah ringawt hian hlimna tak tak leh hringnun hmachhawn zel tura chakna leh huai­senna a pe lo tih a lang chiang hle.

An hlawhtlinna hi chu a ropui a, mah se hlawhtlinna, larna, sum leh pai hian hlimna tak tak min pe lo tih tarlan ka tumna mai a ni. Thinlungah thlamuanna leh hlim­na tak tak kan neih si loh chuan eng ang pawhin ropuiin hlawhtling mah ila, nun chhungrilah hian ruak leh kim lo a awm tlat ṭhin. Ral leh mai thei thilahte hian hlimna leh thinlung thlamuanna tak tak kan hmu thei ngai lo ang.

Saint Augustine thu hian tawp in khar teh ang - 'Lalpa i tan a din kan nih ang takin, kan thinlung hi nangmahah chawlhna a hmuh hma chuan hahchawlhna hmu loin a awm reng ṭhin.'