Eirukna do kan duh tak tak em?

Corrup­tion a hluar tiin kan iak kan iak a, a do tura pen chhuak peih erawh kan awm si lo. kan hmazawna hamṭhatna bawh tur a awm hlek erawh chuan a tua te mah hian khaw eng kan zah zo leh si lo niin a lang.

Corruption chung­chang kan han tui sawi tak tak phei chuan duh taka kan thlan lal kan sorkar hruaitute pawh hi hremhmumah kan thawn liam deuh vek mai zel. Amah­erawhchu, eirukna do tak tak tura thawk chhuak peih erawh kan awm lem lo a, hemi kawngah hian mimal tlawm ngaiin corruption do tura an din PRISM hi an fakawm ka ti.

Mizoram sorkar hnuai­ah Anti Corrup­tion Bureau (ACB) kan nei a, mahse he department lian tak, kum 30 chuang kan neih tawh ai hian tun hnaia pawl din, kum 10 vel emaw chauha upa PRISM hian corruption do kawngah bik phei chuan an thawh hlawk viau zawk niin a lang. Mizoramah corruption case nei tura an chhui chhuah pawh a za-bi an ni tawh a, hrem erawh an vâng hle si; hetiang hi corruption duh lotute ram dinhmun chu a ni.

Corruption phoro tum nia insawi Cong­ress kaihhruai sor­karah Mizoram Lok­ayukta Act, 2014 an han pass leh ta a. Sorkar lam chuan he bill hi India rama corruption dona tur hmanraw pawimawh ber pawl nia an sawi laiin a hre chiang deuhte chuan he bill hi ha nei tawh lo sakei tar ang chauha hlauhawm lo niin an sawi a. Corruption tihbo lam aiin corrup­tion biruktirtu tur bill niin an sawi hial a. Lokayukta hi thawm nei loa kum tel a awm tawh dan aṭanga chhut phei chuan corruption phoro chu kan la hlat deuh deuh dawn niin a lang.

Tunah pawh kan hotuten Mizoram sum dinhmunin a sen a kawk an ti fo a, mahse mipui laka chhiah lak chi hrang hrang an tihsan bak sum renchem tura hmalakna dang a awm meuh lo. Kan hotute hlawh leh hamṭhat chi hrang hrangah sorkar sum renchem tumna hi mipui beisei angin hmuh tur a awm tlat lo. Mitdel sai en chuan a tak an zut tal a, corruption do kawngah hian mitdel sai en pawh kan la hlat viau niin alang.

Kohhran hruai­tute, kan NGO-te leh politician-te pawh hi en ila, an hram ri leh an hniak a inmil bik miah lo.

Pawl tizahawmtu aiin pawl zahawmna hmanga mahni tana beitu an tam zawk hial maithei. Eirukna hi do kan tum tak tak em le?