Mizote min ngainêp hle
Tunlaia Mizoram hmun tin maia kawngpui chhe lutuk ka hmuh hian, vai ho - kawng enkawltu leh siamtute'n Mizoram leh Mizote min ngaihnêpzia leh min thamlohzia a lang chiang hlein ka hre ṭhin.
Mizoram mamawh tinreng mai, kan ni tin mamawh hrang hrangte bakah, bungrua a tê ber aṭanga a lian ber ber thlenga kan lak luhna kawngpui pawimawh em em mai heti tak maia a chhia hi rilru a na ve det. Bungraw pawimawh tak tak phurtu truck-te an tlan hlei thei lo a, tam tak an tâng a, ṭhenkhat a let/tlu hêt hût a. Kolasib leh Sairang inkar km. 60 vel erh awrh chauhah pawh kawng chhia vangin zan tam an thang ṭhin mek a ni! Tunah phei chuan oil leh thil dang dangah harsatna kan tawh phah mek a nih hi.
Lunglei leh Tlabung inkar kawng lah a chhe rapthlak rei tawh narawh. National highway tho, Ngopa lam kawng lah rapthlak takin a chhe mek bawk. Kawng siamtute hian Mizoram chhimthlang lam mipuite an ngainêp hle a ni.
Lirthei neitute emaw, NGO dangte emawin lungawi lohna lantira an nawr loh chuan national highway enkawltu NHIDCL leh an hnuaia kawng siamtu contractor/company-te hian kan rama kawngpuite hi an ngaihthah tak zet a ni. Heti lutuka chhia kawngpui min hlui reng mai hi chu a thinrimthlak tak zet.
Kan Mizoram sawrkar hotute pawhin kan kawngpui pawimawh chhe lutuk hi an ngaihthah rei deuh niin a lang. An inthlahdahin an ngaihsak tawk lo zawk pawh a ni ang. Heti lutuka kawng chhia hi chu mutmawh hnarmawhah an nei tur a ni dawn lawm ni?
Mizoram sawrkar leh PWD enkawl a ni lo, tih hi chhuanlam a nih theih tho rualin, chhuanlam tluantling a ni lo. A chhan chu an enkawl Mizoram chhunga kawngpui a ni tlat. Heti taka Mizoram kawngpui a chhia a nih chuan na takin NHIDCL leh contractor/company-te an nawr ve tur a ni a, a ṭul phawt chuan vaute pawh an vau mai tur a ni.
PWD Minister hian fûr ruahtui tlak hnuah tuna kawngpui chhe em emte hi a hmunah a la tlawh miah lo a nih ka ring, a tlawh thu media-ah hmuh tur a awm lo. Kan PWD Minister hian ka beisei a pha lo, a nêp ka ti ta riau mai. Kawng chhiate hi han en zung zung se, ṭawngkaa inchaha invau chiam loh pawhin a hmuna tlawh ringawt pawh kawng enkawltute leh siamtute tan chuan 'pressure' a ni nghal sa hrim hrim.
Tunah chuan kawngpui chhia hi oil leh thil dang dangah harsatna kan tawh phah ta mek. He harsatna hian sawrkar leh kawng siamtute a kai harh ta deuh a ni mai thei. Harsatnain a kaih harh kher ngai lovin, harsatna lian a thlen hmaa hmalak vat vat hi Mizoram sawrkar leh kawng enkawltute tih tur, mawhphurhna, tihmakmawh a ni e.
- Zoramchhana