Mizote mamawh politician

Ram zalen, mipui rorelna ram, Mizoram politics kalphung hi han chhut ve teh. Tuna kan politics khelh dan phung hi ṭhangtharte chhawm zel atan i duh em?

Dawta in puh leh midang sawichhiatna politics-ah kan chhuah zo ta a nih hi. Hman ni lawk khan Delhi CM chuan "kan hnathawhah hian in lungawi lo a nih chuan min vote duh tawh suh u" a ti hmiah mai. Hetiang hi tuna kan ram hruaitute leh kan hruaitu hmasate hian an ti ve ngam ang em? Pathian nung betu intite hian milem betu kan tihte hi thu dik ṭana huaisenna kawngah hian kan um pha lo em ni? Mizo ṭhalaite hnenah tunge i politician ngaihsan ber leh entawh tlak i tih tia zawhna an zawh hunah hnamdang hming ni lo, Mizo hming ngei an lam ve hun a nghahhlelh. 

Zoram hian mi huai­sen, mi dik a mamawh takzet tih chu kan mi­khual­te kan chunga an chet fo danah hian a chiang viau in a rinawm. Kan pi leh pute kha vai buh ngai loin an intodelh a, tunah thiamna a sang a, mipui pawh kan lang changkang ve viau tawh, chu tih rual chuan India awpna hnuai ata indang ngam tur pawh awm tawh lo khawpin a ni kan pachhiat si ni. State puitling kan nihna pawh kum tam a ni tawh, kan ram leilung hi a chhe ta thut a ni hran lo, zir thiamna lamah lah hma kan sawn nasa, ram hmangaihtu tak takten ṭhahnem ngai takin min enkawl nise intodelh a hun viau tawh lo maw? Nge ni kan retheihna hi remchangah kan hmang zel dawn? 

Nula tlangval leh nupa inkarah chauh ni lo, ram enkawlna kawngah pawh hian thutiam hlen mi an va pawimawh em. Thutiam ropui lutuk pawh kan hlen si loh chuan engnge a hlutna? Inthlan hmaa kan thutiam ropui tak takte hian a

tak ram thleng vek sela zawng, ram nuam leh awh awm ber pawl kan ni tawh ang. Kan thutiam bawhzui tura hmalakna hi han thlir ila, hlawhtlin palh kan hlau emaw tih tur khawp a ni tlat zel. Tlin duh vanga tih theih loh tawp tur leh ram mipuiin an mamawh miah loh thu tiam kur nguai hian retheihnaah min hruailut ta a nih hi. Thutiam hlen ṭhin, a chezia leh a hnathawha Pathian hmel lan theihna tur hruaitu Zoramin a mamawh. 

In sawichhiat a, mahni tih fak mawi chawpa mi hlawhtlinna sawi bo tum tlat hi politics khelh dan phung ṭha leh dik a ni lo. Facebook lamah Zoram politics sawi na group a awm nual. Chungah chuan, chhungkaw pa ber ni awm tak te hian midang sawichhiat leh an party diklohna khuh mawi hi nileng hnaah an nei emaw tih tur hian an vil reng mai nia. Anmahni an zak lo a nih pawhin an chhungte chu zakin an kun ve ngei ang le. Mahni pawh inlan ngam lo a fake account siam lah bo lo. 

Social media hmanga mahni awmna party ṭhat­lohna khuh mawi a mi­dang sawichhiat hna thawk­tute hi contract te an pe ṭhin tih te hi thu dik a nih leh zel phei chuan kan politics chu zu hmuna sawi atan pawh a tenawm a ni ber ang. Ram tana thil ṭha tih duh anga lang, midang thil ṭha tih ngaithei si lo, mahni a ti thei chuang si lo kan tam lutuk a ni mahna. Fak mawi chawp leh tih dik loh thup sak reng ngai lo hruaitu dik zoram hian a mamawh. Mahni diklohnaah pawh thiam chan tum lo, mahni diklohna pawm ngam, chu mi siam ṭha leh tura bei ngam hruaitu kan mamawh. Tunah chuan kan hnu­hma pawr pawh sawi mam hram kan tum zel a, ṭhangtharte tan kan politics khelmual hi luh ve na tlak lo khawpa tenawm leh hmuh­sitawmah kan chhuah mek a nih hi. 

'Hei chu a fel si, poli­tics-ah hian in hambuai ve lo se la' tih ṭawngkam kan hmang ta fo mai, mifel luhna tlak loh khawpa tenawmah em ni kan ram rorelna chanvo pawimawh hi kan lo chhuah tak? Kan tih dik lote thup bo a, dik anga lan kan tum tlatna hian ro min rel dik tir thei lo a, kan huaisen thei lo chu a nih hi. Kan diklohna hi pawm ila, simin dik takin nung ila. Chu chuan kan ram kan siam ṭha leh mai dawn alawm.