Chimral kan hlau em? Dan hi hmang thiam zual ila
Mizote hi Scheduled Tribe kan ni. Schedule Tribe nih phung hrim hrim hi a hmasa berah chuan primitive (mihring awm hmasa leh mawl lai thil, la changkang lo, mawl, la hmanlai) zia hi kan tilang a, culture (mahni hnam finna leh thiam thil) danglam tak nei kan ni. Mipui vantlang lakah zakzum tlat, awmna hmun kilkhawr leh la hnufual bik hi a ni. Hman tlem apiang leh la hnufual tena an hlauh em em chu inchimral (assimilation) hi a ni a, Mizote ngei pawh hi Schedule Tribe zingah chuan inchimral hlau tak zinga mi kan ni a, kan hnam a la naupang a, kan la tlem bawk a, a awm hle a ni. Inchimral kan hlauh chungchang hi buaipui tham tak a ni a, ram hmasawnna siamtu leh daltu a nih theih tlat avangin kan ngaihven tlan a ṭul hlein ka hria.
Kan ram hruaitu ṭha tak zinga mi, Brig. T.Sailo khan kum 1972 daih tawh khan Mizorama rel lo luh theihna tur kha a lo ngaihven tawh a. Tun hnaiah sawrkarin Mizoram rama rel a lo luh theihna turin hma a la a, mi ṭhenkhat chuan rel a lo luh chuan vai tam tak an lo lut ang a, kan la tlem si a, min chimral mai ang tia rel lo luh duh lo te kan awm a, mah se rel lo lut tur hi hlauh chi niin ka hre lo. Rel lo luh avanga kan hmasawnna tur hi ngaihtuah a ṭha zawkin ka hria.
Rel a lo luh chuan thil man sang lutuk hi a ziaawm ang a, transport lama kan insensona tam tak hi a ziaawm bawk ang. Hna a tam sawt ang a, Mizoram hi tlawh pawh a awlsam sawt ang a, tourism lamah pawh hma kan sawn phah hial ka ring. Medical lamah pawh kan changtlung sauh ang a, phai lama kan in refer ṭhin leh medical reimbursement-ah Mizoram sawrkarin sum a seng leh ṭeuh a. Vai doctor thiam tak takte hi Mizoram hian ngah hle ila medical lamah chuan hei ai hian hma kan sawn dawn a, sawrkarin phai lama inenkawl nana sum tam tak a hman ṭhin hi kan khawl thei dawn bawk a ni.
Zirna lamah pawh hnamdang thiam tak takten hna an rawn dil ṭhin a, ṭhenkhat chuan eng ang pawhin thiam se, hnamdang hna han pek kha an helh tlat ṭhin a, a pawi hle. Hman deuh khan college pakhatah chuan ziritirtu an lak dawnin Manipuri a ni a, a subject thiam tak leh zirtir thiam tak a ni a, mah se Mizo a nih loh avanga lak duh lotute kha an awm nual a, a thiam em avang khan an la ta tho a, a lawmawm hle. Kan ramin a thiamna kha kan lo tel daih zawk a, chuvang chuan zirtirtu lak lamah pawh hnamdang pawh ni se, an thiam miau chuan lak mai hi a ṭha a ni.
Mizorama concrete in ṭha tak tak, sawkar office, kan biakin tam zawk hi vai mistiri te sak leh siam deuh vek a ni. Vai mistiri hi awm loin chah chhoh ngai ta zel mai se kan buai ngawt ang. Vai College pakhata Asst. Professor pawhin Mizote chu chimral in hlau lutuk a, hma in sawn tur ang pawhin in sawn thei lo a ni a ti hial a, a dik hlein ka hria. He thusawitu ngei pawh hi Mizo zirlaite tana a thiamna leh finna hmanga ṭhahnemngai taka Mizo mithiam tam tak chher chhuaktu a ni. Kan pi leh pute khan sap Missionary ho te kha kan rama an lo kal phal loin lo hnar ta se tun dinhmun hi kan thlen pawh a rinawm lo.
Khawvela ram thiltithei ber America ram ngei pawh hnam hrang hrang awmkhawmna ram a ni tlat. Chuvang chuan hnam chi hrang hrang awmkhawm thiam leh theihna hian theihna chi hrang ṭheuh ‘force’ chak tak a siam a ni tih a chiang hle.
Chimral theih mai mai kan ni em ni? Tunlaiah ram tin hian mahni ram humhalhna dan ṭha tak kan nei thei ṭheuh a, India dan pui Article 371(G) ah hian Mizoram dinhmun tarlan a ni a, Number (a) (iv) ah Ownership and Transfer of Land tihah hian Parliament in Mizoram Sawrkar rawn lo chuan dan siam mai tur a ni lo tih a awm a. Land Laws kan nei a, kan Land Laws zinga Mizoram District (Transfer Of Land) Act, 1963 hnuaiah chuan tribal-in non-tribal hnena Mizoram chhunga ama duh thua ram lo hralh, dahkham, hawhtir, thleng emaw lo pek hi thuneitu phalna lo chuan a theih loh. The Scheduled Caste and the Scheduled Tribes (Prevention of Atrocities) Act, 1989, he Act hnuaiah hian Scheduled Caste emaw Scheduled Tribe ni loin Scheduled Caste emaw Scheduled Tribe-te laka thil tisuala nunrawnna lantirna khapna dan leh a hremna dan a ni a, heng dan bawhchhiatna lakah trial neihna tur special courts siam a, heng pawikhawihna lo tuartute tana relief leh rehabilitation pek te a ni. He Act hnuaia Section 3(iv) leh (v) ah hian SC/ST ni loin SC/ST ram an lo hmang emaw an lo chhuhsak a nih chuan, chung thil titu chu thla 6 aia tlem lo, kum 5 thlenga lung in tantir theih a ni a, pawisa chawi tir theih a ni bawk. Chuvang chuan ram dang miin kan ram hi an duh duhin an rawn luah thei ngawt lo. Kan ramah ramdang mi lo lut pawh nise, chimral theih mai ka ni lo. India Constituition Article 371(G) hi kan ram leilung hausakna humhalh nan hman tur a ni a, kan sawrkarte hian an hmang ṭangkai thiam lo/ ngam lo a nih chuan a pawi ngawt ang.
Ni 13.9.2007-a UN General Assembly-a President thupuan chuan, 'Now indigenous people has a home in the UN.They had every right equal to all others over their land, territory and resources. No outsiders should utilise their land,territory and resources without obtaining their free, prior and informed consent,' tiin a lo puang hial tawh a ni. Ka Pa chuan, "Mizoram State Legislative Assembly hian ’Kan ram zawng zawng hi UNO thupuan ni 13.9.2007 ang hian kan ta a ni' tih resolution hi han pass phawt mai sela, ṭhangtharin kan bawhzui thei ang," tiin a article Political and Constituitional History tihah chuan a ziak hial a ni. Chuvang chuan mipuite pawh hian hnamdang lo lut turte hi hlau lo ang ang u, Mizo leh Mizo vek kan indawr kual reng chuan hmasawn tak tak a har hle ang. Khawvel hi a zau a, zim taka kan thlir chuan hma kan sawn har lutuk ang.
Scheduled Tribe kan nihna anga Central Sawrkar lama hlawkna kan neih theihte hi kan ram hruaitute hian an hai chhuah thiam a ngai. Arunachal nen state kan ni rual a, MLA 40 kei nin kan nei a, Arunachal-in 30. Hei hi 1987 a kan dinhmun a ni. Arunanchal chuan 50-ah an nawr a, 60-ah an nawr leh a, an nei mai; keini chuan 40 bak hi ṭha lo angin kan ngai leh tlat thung. India dan pui Article 170-ah chuan State MLA chu 500 aia tam lo 60 aia tlem lo an ni ang tih a ni. Hengte hi MZP/ MSU/ YMA/ political party te hian kan ngaihsak ngam tlat lo. Chuvang chuan kan ram hruaitute leh hruaitu la ni zel tur hian kan ram chhung dan leh India Constitution hi zirin hre chiang se, hmang thiam lehzual se, tun ai hian hma kan sawn a rinawm.