Dawrpui Veng nge nge
Hman deuh khan Atta Lane lar laiin Dawrpui Veng ṭawpzia an sawi a ni awm e, chutah chuan Dawrpui pa thuthiam zat pakhat hian, "Dawrpui veng a ṭawp in ti maw? Chuti chu in veng tlangval ṭheuh hi han hruai haw teh u le. Dawrpui chu a thianghlim ngawt ang," a ti e, an tia lawm.
Dawrpui Vengin sorkar thupek zawmin an veng chhunga sorkar building-ah zu zawrh chu an dodal lo a, he veng hi an puitlingin an fakawm ka ti khawp mai. Dawrpui hian zu hi in hum hum se, rui suau suau se, tei hut hut se, ṭhalaite zanah au bengchhengin ri chel chul se an ti miah lo, Dawrpui hian sorkarin zu zawrh ṭha a tih takah chuan an veng chhunga zu an zuar chu tihbuai loh nachang an hre mai a ni a, an fakawm ka ti khawp mai.
Aizawla dan anga zu zawrh duh loa na taka dotu veng pakhat hian tunah hian dan phal loha zu zuar an kawl ruih mai an ti. Dan anga zu zawrh chu zahthlak, an ṭhalaite chhiatna tur leh veng tiṭawptu turah an ngai ve hnuhnawh tlat a nih ka ring.
An hriat loh nia ka lo ngaih zawk chu an venga dan loa zu zuar awmin an veng a tiṭawp zawk a, an veng zahawmna a tihniam viau zawk.
Dan anga zu zawrhna Dawrpui Veng hi veng dang aia a ṭawpna ka hre lova, a thianghlim zawk mahin ka hria.
Dawrpuiah miin zu an lei a nih pawhin a leitu lam an fing tawh a, he vengah hian kheuh hawngin an in nghal tawh lo. Bag-ah an khunga mahni veng ṭheuhah an hawnpui ta vang vang a, a hnuah an duhna hmunah an in ta mai zawk ṭhin a ni. Dawrpui Veng chu a leh thianghlim ta hlauh a nih chu.
Heti zawng pawh hian kan sawi thei ang. Dawrpui Veng hi chuan sorkar thu an awih a, midang hi chuan pawn lama lan mawi duh vangin sorkar thu an awih duh lo a, chu chu Kristian ṭha nihnaah an ngai bawk a nih hmel. Sapramah khuan zu zawrhna a tam em em a, chu chu an khuaa hmun ṭawp tihna a ni lo. A zawrhna ni lo a inna hmun hi hmun ṭawp chu a ni zawk e.
Aizawla veng tam takin zu zawrh an duh lova, Dawrpui Vengah va kalin an va lei a, zu zawrh duh lohna vengah tho chuan an va in leh ta a. Ngaihtuah chian poh leh Dawrpui Veng hi ka ngaisang tawlh tawlh mai. Lan mawi an tum ve lem lo a, ka mitah chuan an mawi ber. Veng tin hian Dawrpui Veng ang hian zu zawrh hi dodal ve kher lo se, zu rui zawk hi dodal ila Aizawl hi a nuam sawt ang.
Dawrpui, mi hausa veng kan tih ṭhin nge nge an hawi zau a, an fakawm ka ti khawp mai.