PC Party hi an ral mai dawn em ni?

People Conference Party, a tawi zawnga PC Party kan tih mai hi rual u deuhte leh politics ngaihven deuhte chuan kan hre hlawm awm e. Mahse, tunlai ṭhangthar lehzual, a bikin vote neih ṭanna la rei lo deuhte leh tleirawlte zingah chuan hre chiang lo leh hre lo tawp pawh an awm nual tawh mai thei. PC Party hi a chang chuan MPC (Mizoram People Conference) tihte pawh a lo ni tawh ṭhin.

Kum 1978 aṭang khan kum 6 vel chhung Mizoram UT sawrkarah thuneihna (sawrkarna) an chang a, an hotupa Brig. T Sailo chu Chief Minister a ni. Kum 1998 khan MNF nen ṭang dunin an lo sawrkar tawh bawk.

Mizorama PC Party len lai leh lar vanglai hun a liam a, tunah chuan tih tham an awm tawh lo niin a lang. Member pawh an tlem tawh hle niin a hriat a, Mizorama political party lian zingah an tel lohna pawh ṭhang hnih/thum vel a ni tawh awm e. An hruaitu lawkte pawh Mizo zingah mi langsar an ni pha tawh lo a, PC Party hrim hrim leh an hruaitute hi ṭhangtharte phei chuan an hre tawh lo viauin a rinawm.

PC Party dintu Brig. T Sailo a awm tawh loh bakah, Party chawi nung hram hramtua ngaih theih a fapain a chawlhsan tawh bawk nen, tun hma aṭanga PC ṭang ṭang ṭhinte pawh an ṭil ṭiak ta deuh niin a lang. An President pawh PRISM lam mi a ni daih tawh. An hmunpuiah hruaitu mi tlemte an la awm ve der der a, mi leh sa an nei meuh tawh lo niin a lang deuh roh.

PC Party hian MLA an neih lohna a rei tawh hle mai a, kum 2008 MLA inthlanah khan ZNP nen an ṭan dunna aṭangin MLA pahnih an nei a, kum 2013 MLA inthlan aṭangin MLA an nei tawh lo niin ka hria; kum 2018 leh 2023-ah pawh MLA an nei tawh lo tihna a nih chu.

Mi sawi danin, PC party hian MLA an neih loh rei tawh avangin Election Commission recognised party a nihna a paih a ni tawh a, registered party erawh a la ni zel thung.

PC Party hian kum 2023 MLA inthlanpuiah candidate eng emaw zat an la nei a, kumin 2024 MP thlanah pawh candidate an la nei. Mahse, kumina AMC by-election pahnih (ward 19-na leh 6-na)-ah candidate an nei lo ve ve a, VC leh LC by-election-ahte pawh candidate an nei tawh meuh lo niin ka hria.

Political party nihna leh an tih turte hi chiang takin ka hre lo a; ka lo ngaih ve dan chuan, political party chuan inthlan a chuh tur a ni, tih hi a ni. Political party ni si, inthlana candidate neih loh ziah chu a dik thei lovin ka hria a, political party an nih anga an tih tur leh mawhphurhna tih lohna niin ka ngai ve ngawt a. Dik tak maw?

PC Party hi tun ang zela an kal chuan an ral mai dawn niin a lang deuh roh a, inthlan an chuh loh fo chuan ECI registered party aṭangin paih an la ni lo ang tih sawi theih a ni lo. Political party an ni zel duh dawn a nih chuan inthlan an chuh ve ṭhin a ngai. Chuti a nih loh chuan mipui, a bikin ṭhangtharte'n an hre lo tial tial dawn a, an ral mai dawn a ni.

- Zodinsanga