Biak ina mutthlûk hi sual hnathawh a ni em

Biak ina i inkhawmin i muthlu ṭhin em? Rawngbawltu pakhat chuan, “Biak ina mutthluk hi sual hnathawh a ni a, chuvangin, ka inkhawmin ka mutthluk loh nan ka bei ṭâng ṭâng ṭhin,” a ti. Mizote biak ina kan muthlu nasa lutuk hian kan tih tak lohzia a tilang a ni. Bible-ah chuan, 'Pathian chu Thlarau a ni a, a chibai bûktute’n thlarau leh tih tak zetin chibai an bûk tur a ni’ (Johana 4:24) tih a ni si. Chuvangin, Pathian hi thlarau leh tih tak zeta chibai kan bûk hi setana hian a hlau a, mutthlukna hmangin ringtute hi min bei ta a ni.

Kristian nun kaihhruainaah chuan heti hian a inziak a: “Ringtu zawng zawngte’n Pathianni an serh tur a ni. Hahchawlh nan hmanga mut bo nan leh mahni châkkhai lam nan hmang lovin, Pathian biak nan leh a thu ngaihthlak nan te, an thlarau tana sâwt tur apiang tih nante an hmang tur a ni,” tih a ni a. Tuna Pathianni kan hman danah hi chuan mahni ina mut nan hmang si lo hian biak in hi mut nan kan hmang a ni ta ber mai lo maw.

Pathianni chawhnuah hian i inkhawm ṭhin em? I inkhawm ṭhin chuan thusawitu thu sawi lain han hawi vel teh, mutthluk rûnpui kan buatsaih a ni ringawt a lawm; muthlu lo reng reng kan awm lo a nih hi. Bible-in ‘Pathianin vawiin thlengin an hnenah mutthlukna thlarau a pe a, hmuh theih lohna mit te, hriat theih lohna bengte nen,’ (Rom 11:8) a tih ang mai kan ni ta. Inkhawm zawng zawng deuh thawte chu kan muthlu ṭhin a ni ta ber a, Pathian thu ngaihthlak nan Pathianni kan hmang kan ti ngam ang em? Thusawitu thu sawi hi kan hre meuh em le? Thusawitu tan chuan a va beidawnthlak dawn tak em. Aw, ringtu, Thlarau Thianghlim tih chakna changte u, hei hi in chanvo a ni e: "An zingah tu mah an hah lo vang a, an inchhuih hek lo vang, tu mah an muthlu lo vang a, an muhil hek lo vang," (Is 5:27) tih hi. Eng tin emaw tak chuan Pathian nia kan inkhawm dan hi chu her rem a ngai a ni lo maw? Heti chung hian, kan kal dan pangngai hi a ṭha e, kan la ti zel dawn em ni?

Kohhran upate pawh biak ina mutthlukah chuan an bâng chuang lo, a muthlu hmasa saah an ṭang emaw tih mai tur lah ni. Eng tin nge an member-te chu an mutthluk loh ang ni. Tuin nge muthlu lo turin fuih ta ang le. Zawlneiin Assuria lal a tih ang mai kan ni ta e. “Aw Assuria lal, i beram vengtute chu an muthlu e, i mi liante chu an châwl a, i mipuite chu tlangahte an darh zo va, hruai khawmtu tu mah an awm lo,” (Nah 3: 18) a tih ang mai hi. Miin Pathian thuchah ṭha tak pawh sawi se la, hria a bar kan awm tawh lo tihna a ni a, eng tin tak Pathianin muthlu chunga kan inkhawm ṭhin hi ngai ang maw?

Mi ṭhenkhat chuan an hrisel lohna chhuanlamah hmangin an mutthluk phah ṭhin; an thisen sang leh an zunthlum te. Hengho pawh hian an mobile phone enin leh an duh zawng tih nan chuan rei tak tak an meng leh thei tho si a, biak in a nih avanga darkar khat pawh kan meng thei lo hi chu a mak a ni.

Kan Pathian thu chuan heti hian a sawi a; “I mit chu muthilhtir suh la, i mit vun mutthluktir hek suh,” (Thuf 6:4) a lo tih hi. Biak inah chuan zawm i tum hram ang u. Chuvangin, biak ina mutthluk kan inthlahrung lo lutuk hi chu inen chhian kan ngai khawp mai. Nangni, kohhran upa duh takte u, he sual hnathawh, biak ina mutthlukna hi engtin nge in do dawn le? In beramte mutthlukna sual lakah hian engtin nge in chhanchhuah dawn? In mutthlukpui reng dawn em ni? Rawngbawltu talte hi chuan thinlung leh tih tak zetin biak inah Pathian i be teh ang u. “Pathian chu Thlarau a ni a, a chibai bûktute’n thlarau leh tih tak zetin chibai an bûk tur a ni,” (Joh 4:24) tih hi zawm hram i tum teh ang u.

Nang chhiartu duh tak, biak ina mutthluk hi sual hnathawh niin i hre ve em?

- Hausanga Hauzel