Zu zuar tawh mai ang u
Mizoramah Congress sorkar laiin dan ang thlapin zu zawrh a ni a, revenue pawh a hmu ṭha hle. MNF-in an han ṭhiat leh a, kan hman thiam tawh tehlul nen, a uiawm ngawt mai. Lo zuar tlang zel se chu state dangte ang bawkin ngaiah kan neih vel mai mai tawh awm si a.
Zu zawrh leh zawrh loh chungchangah mai bakah, thil hrang hrangah kohhran a inrawlh nasa lutuk hi a khamawm hle. A bik takin Synod hi sorkar chunga leng ang maiin a khawsa ni berin a lang. Chuvangin party hrang hrang pawh hian kohhran a hlau hlur mai a, a dik hauh lo. Rorel tura kan thlante chuan eng policy pawh an kalpui tur a ni dawn lawm ni? Engvangin nge Synod te, MKHC-te an hlauh viau ni?
Zu hi taksa tan chuan a ṭha miah lo, mahse, a in duhin an in miau si a. Man to tak takin an lei a, state sorkarin hlawkna pakhat mah a nei bawk si lo. Ṭhenawm state leh ram (Assam,Tripura leh Myanmar) tan pawisa an seng nghek nghek mai a nih hi. A bik takin Vairengte thlang lawk Cachar district hi zu-ah chuan an hlawk ber awm e. Vairengte Excise-te'n theihtawp chhuahin lo check mah se, a ruka thil tih a nih miau avangin dan hneh ngaihna a awm chuang lo.
Mizoram state pachhe si, thawh chhuah ngaihna awm si lo, tuialhtheiahte chhiah an han la sang hret a, opposition lahin sorkar beih nan an hmang leh lawi si. Zu aṭanga chhiah lak kha a tam ve viau a, khang chhiah lak avang khan state sorkar pawh a ziaawm phah lo thei lo. Chhiah lak chu sawi loh, kan sum tam tak state dangah a kal ral tam lutuk ringawt mai pawh hi a uiawm zozai tawh a ni.
A nih leh aw, Synod hi Mizoram kohhranah chuan a lian ber a, sum pawh kohhran mipuite thawh khawm a tam hle tih kan hre vek awm e. Heti khawpa kohhran hausa chuan sorkar sum lak luhna tur zu zawrh a dâl tlat si chuan sorkarah thla tin sum chhung lut ve se la. Sorkar pachhe chung chungah policy a duan han dan tlat mai hi a Pathian thu bik em ni?
Sawi tawh angin, sorkar hmasa lamin zu a zawrh lai kha chuan state danga zin pawhin zu an hawn ṭûn ṭûn ngai lo a, zu khap a nih leh chiah khan Aizawl/Lengpui Airport-a ṭum tur suitcase an han check a, suitcase ṭhenkhatah chuan zu ûm a awm ṭhin a, hei pawh hi a zahthlak a ni.
State dangah han zin ila, zu dawr kan hmuh chuan kohhrana inhmang tak pawh hawi hû hû a nih si hi! Mizo mualphona chi khat a ni hrim hrim. Bar-ahte zu an han in a, total prohibition state aṭanga kal chu in dan tawk pawh an thiam lo a, an mualpho fo a ni. A chhan chu kan state-ah zu kan zawrh loh vang a ni.
- Lalkhirhvela