Vai hlau Mizoram politician

Tun hnaia India rama Kristiante tihduhdahna a na­sat dan leh BJP sorkar vanga Hindu pawl hrang hrang an inlulin dan ka en hian Mizoram sorkar hi an au chhuak ngei turah ka ngai a. Congress hi BJP hmelma an ni sa chung pawha BJP demna an chhak chhuak tlem hi chu BJP sorkarin pawisa an hren sak an hlauh vang a nih ka ring tlat a ni. Ka rin dan ve mai a ni chungin a chhan dang puh tur pawh hi a awm loin ka hria.

Tichuan anni aia BJP hlau chu MNF an ni a, MNF hian BJP hi an tlawn a, a va han zahthlak tak em. Regional party chu regional party ni ngam mai se, tunah hi chuan zawmpui nei duh si, Mizo mipui hlauh vanga BJP zawm anga awm ngam si lo, BJP duh dan dana awm tho si an nih avangin MNF hian tum mumal an nei loin ka hria. Kan Cheif Minister zahawm tak pawh lo ni ve tawh MNF president-in BJP tirha hel a bia in­tihtheihna atan a hmang leh MNF party worker-in central sorkara an tlaktlumzia tehna anga an lo sawi ve chhan hi an zahpuiawm ka ti khawp mai.

Regional party dang pakhat chu ZNP an ni a, anni hi chu an party hmingah pawh nationalist rumrût tura ngaih an ni. He party hi ṭhalai pawhin an ngaihzawn rawn deuh kha an niin a lang a, facebook-ah phei chuan an lianin an thawm pawh a na hum hum a, kan han inthlang chiah kha chu rin ang an lo la ni lo. MP inthlan dawn khan an bawh sual ta vei zuk a, BJP kha a tlawnin an tlawn a, Mizo Nationalism sawi chunga BJP nen inmawngzawm an hreh loh avangin kei chu ka bei a dawng a ni mai.

Tun hnaia press release lama BJP laka vui ngam ber leh sawisel ngam ber chu MPC an ni. Anni hi party ṭhangduang tak a nih bik loh avangin Mizo mipui khai chhuaktu atan chuan ka ring ngam lo tlat a, chuvangin ka rilru hi a buai khawp mai.

Vai hlau lo, vai tlawn lo, party rethei deuh nih dawn pawha mahnia ding ngam party hi piang se kei chuan ka thlawp nghal ang. Tunah hi chuan BJP hlau leh BJP tlawn party bak kan nei lo.