Ram damna SRS
Keini ang lehkha zir sang ve lo tan chuan na tak leh rum taka ruihhlo do leh SRS-in huaisen taka ke an pen buan buan aia ruihhlo do dan ṭha hi ka la hre lo reng reng.
Miin SRS vanglai khan an dem thute an lo sawi chhuak a ni awm a, an fate ruihhlo vangin thi ve ngat se SRS kha 100% in an support ve ngei ngei ang tih hi ka sawi chiang ngam a ni.
Keini ang, kum lama upa tawh tan chuan Mizo ṭhalaiten zu ni lo thil dang ruih an nei ṭhin hi hriatthiam theih pawh a ni lo. Ṭhangtharte hian nawm an duh em avangin awm mai mai an thiam ta lova, kutpui nikhuaa zu in ang mai chu duhtawk tawh lovin zu ngawlvei tam tak an awm a, chu aia chhe zawk leh tun hmaa kan la hriat ngai loh drugs Mizoramah a lo lut a, kan tu kan fate chu drugs ngawlvei an lo ni ta. Hei chauh pawh hi a nain a hrehawm tawh tehlul nen chu drugs chuan an nun a han suat zui a, an damlai reng pawhin mi pangngai phak loin ruih tur leina turin pawisa leh thil dang ruk tur an zawng a, damlai hremhmun an lo sawi ang thawthang hi in chhung khurah kan hmang chu a ni ber e.
Tichuan chu drugs do tur chuan SRS a lo ding a, keini angin kan suangtuah phak loh lamin chet an han la a, ruihhlo zuar chu an tawm tawk tawk mai. Chhei, ruihhlo zuar mai a ni lova, ruihhlo ti ṭhin ṭhalaite pawh an biru duak a, a ruih tur ber a awm loh avangin ruihhlo avanga thihna pawh nasa takin a lo tlahniam ta. Hengte hi SRS thawhrah vek kha a ni.
Mak tak maiin SRS chu ṭhiah a ni a, politics-a ṭan ruk ve zawng sorkar tla ai pawhin keia tan chuan an uiawm zawk asin. SRS khan tihsual an lo nei tehreng a nih pawhin tihfuh an nei ngah zawk. An tim tur a ni lo.
YMA thurel lawmawm tak chu SRS din thar leh an rel hi a ni. SRS hian huaisen takin ke pen rawh se. Inthlahrun tur a ni lo e, dan phal loh ruihhlo zuar hi chu dim tur an ni lo. SRS hi kan ram damna a ni.