Intlan chhawk: Lirthei tam vang nge pollution?

Aizawl khawpuia lirthei pun chakzia vantlang hriat a ni a, kan harsatna mek a ni. Kan kawngpui a tam belh lo va, a zauh belh si lo va, traffic tâwt lutuk tihziaawm nan intlan chhawk hi kan hotute’n an ruahman kha a ni.

Intlan chhawk kan hmanna hi a rei ta hle mai a. Intlan chhawk kan tih tirh kha chuan a ziaawm deuh chuan a hriat a, tunah erawh chuan intlan chhawk pawh hian awmzia a nei ta mang lo emaw tih mai tur a ni. Lirthei tlan loh nia hman tur lirthei dang kan neih belh ta fur mai. Ke hnih nei chi, chi hrang hrang a tam tak avang te, a man a ziaawm a, loan hmanga lei a lo awlsam tak avangte hian neih belh kan tam tial tial a ni. Chhungkaw tam tak hi kan mamawh bak lirthei kawl kan awm ang.

Khawpui tâwt avanga intlan chhawk kan tih mek laiin, electric hmang scooter a rawn chhuak a; sorkar lam chuan electric hmang scooter chu tlan loh ni nei ve lo turin a ti ta daih mai! Delhi-ah chuan boruak bawlhhlawh avangin lirthei tlan dan an khuahkhirh a, electric hmang lirtheite chu boruak bawlhhlawh pe chhuak lo an nih avangin tlan loh ni an neihtir lo a ni; traffic tawt tihziaawmna tur ni lo vin.

India ram khawpui lian danga an harsatna leh Aizawla harsatna kan tawh hi a inang lo a, intlan chhawk kan tih chhan hi a inang lo a ni tih kan hotute hian an hre lo niin a lang a. Intlan chhawk kan hman chhan pawh air pollution vang a ni lo tihte hi an hre tawh lo niin a lang.

Kan kawngpui a chêp avang leh lirthei a tam tawh si avanga intlan chhawk kan nih mek lai leh, tlan ni leh tlan loh ni nei kan nih laiin, electric hmang an nih avanga tlan loh ni an neih loh hian kan traffic tâwt lutuk a tihziaawm theih dan tur kei chuan ka man pha ve lo a ni. Electric scooter tlân avanga kan kawngpui a thâwl a, traffic jam a ziaawm tak thut pawh ka la la hmu lo va, electric scooter avang hian traffic jam a ziaawm thutna tur chhan a awm hek lo.

Electric scooter leh electric hmang lirtheite’n tlan loh ni an neih loh rau rau chuan lirthei dangah pawh hian tlan loh ni awm ṭhin hi hlîp law law se la. Hei hian lirthei pun belh nasa tur te, mamawh bak aia tam lirthei neih ngai turte a tiziaawm zawk ngei dawn; 99.5% velin ka chiang! Kan khawpui boruakte hi chu India ram khawpui dang boruakte ngaihtuah chuan thianghlim ser sawr tak a ni a; Aizawl khaw chhunga boruak tibawlhhlawhtu lian ber chu kawngpuia vaivut, lirtheiin a pal khûk hi a ni mah zawk.

Air pollution hi kan buaina a la ni lo va, traffic tâwt hi kan buaina leh harsatna lian tak a ni. Electric hmang lirtheite hian traffic an titâwt ve thei tho tih hi kan hotute hian an man pha lo emaw, an hrethiam lo emaw a nih hmel.

- Ramropuia