Vai buhfai ei ṭheuh ṭheuh

Vai pawl Congress tia deusawhtu ber ṭhin MNF-in BJP hnuaia inziah luh thu official taka an puan tak avangin "Vai buhfai ei ṭheuh ṭheuh," tiin kan sawi zui thei ta. He article ziah dawn hian a tirah 'Zawlbuka e tang ṭheuh ṭheuh' tih hman ka tum a, mahse Zawlbuk hman theihna tur party an nih loh avangin Vai buhfai ka ti ta zawk a. Tunah chuan ZNP leh MPC-te chiah hi 'Tualṭo party' tia koh theih, Vai control loh awm chhun angin kei chuan ka ngai hmiah tawh.

MNF thuchhuah kha kan chhiar chuan July 13-a Guwahati-a North East Democratic Alliance (NEDA) din a nih thu kha an uanpui hle a, a phena a banner-ah khan Narendra Modi leh Amit Shah te thlalak lian mangkheng mai a chuang a, hei vang hian BJP hui khawm an ni tih hi chu phat theih a ni lo. BJP nen an inzawm avang hian MNF hi Hindu an ni taah ka ngai lova, Hindu sakhaw hnuaiah an intu lut angin ka puh ve lova, ka sawi thiam ve dan chuan BJP hnuaiah an kun ta mai chauh a ni. Hei hi MNF tan thil thar a ni lova, NDA hi zawmin BJP nen hian hun rei tak chhung an lo inkaihkuah tawh a, BJP nen hian inṭhian hnai tak hi an ni kumkhua a ni.

Tuna NEDA an zawm ta hi MNF tan 'survival chance' niin ka ngai a, kum 10 chhung a kaw tawpah ṭangin MLA panga aia tam an nei thei tawh lova, an party Big Three or Big Four-te pawh MLA-a an tlin theih tawh loh avang hian an mangang ru lo thei lova, an manganna tak zawk chu sum leh pai lamah hian a ni. Kum 2018 inthlan tur thlir hian BJP pawisa hman tur an neih loh chuan an tan campagn a huphurhawm a, thingtlang khaw kil tin lirtheia fang chhuak tur chuan an petrol man tum saktu an mamawh a, chuvangin Modi thuhnuaiah an kun ta a ni.

NEDA hi kei chuan comment pek vak ngaihna ka la hre lova, Congress paih hrim hrim tuma intel khawm an nih vang hian ka ring ngam chiah lo. An paih tum Congress hi Mizoramah hi chuan an vawk lal len rei tawh a, an zia kan hre chiang tawh a, min awp danah mipui kan lungawi lem lova, Mizoramah hian an paih thei a nih chuan a lawmawm lamah ka ngai a, mahse tuna BJP-te nen inkaihkuah dual dual lo hian paih theitu nei ila ka duh dan a ni. NEDA hi chuan ram siam tum dan thuhmun an nei lova, beih rawn leh huat rawn Congress an neih avanga inkutsuih vel mai mai an nih avangin an thil kalpui dan hi 'hate politics' an sawi ang lam hawi a ni a, hei hi khuareiah a ṭhat ka ring thei lo.

July ni 13-a Gawuahati-a NEDA din a nih khan North East State pali Chief Minister Assam Chief Minister Sarbanansa Sonowal, Nagaland Chief Minsiter T.R. Zeliang, Sikkim Chief Minister Pawan Kumar Chamoling leh Arunachal Pradesh Chief Minister Kalikho Pul leh Central Union Minister pathum bakah BJP President Amit Shah an tel a, news hrang hrang ka lo thlir kual vea an ziah len ber chu BJP president Amit Shah tel ve thu hi a ni. India ramin a thlir danah pawh BJP-in ram zauh a tumna lamah India hmar chhaka anti Congress pawl BJP-in an sawm khawm an ti a, chuvangin MNF leh BJP hi sawi hran theih loh, party thuhmun ang reng an ni tawh.

Mipui mimirin BJP hi hlauhawmah ngaiin Hindu sakhua nen sawi zawm mahse kei chuan ka hlau ve lem lova, India rama Hindu ni lo ṭhahnem tak awm leh mi lehkhathiam tam tak BJP-a awm te avang hian he ram hi Hindu ramah an din thei lovang. Delhi lama Congress leh BJP sorkar hian Mizoramah chuti he huin danglamna a siam lova, keini tana pawimawh chu state-a sorkarna siamtu lam hi a ni zawk. Tuna MNF-in BJP sum hman duh vanga an hnuaia an kun a pawi ka tihna ber chu kan hnam movement kengtu inti berin BJP ideology zawma Vai buhfai ei an thlang ve ta hi a ni. Congress hi chu Vai Pawl an nih sa tawh avangin MNF tal chu thuneihna tawp siam theiin Hnam Run hi highest authority ni se ka duh tehlul nen, tunah chuan Modi vai khuang ben ruala an lam a ngai ve ta a ni.

India thuhnuaia kun hreh hnam siapai tam takin hotute thuawihin silai an tung a, kum 30 a lian meuh chuan BJP nihliap hnuaia a hlim dai nuam chhim turin ke an pen ta a, hei hi hnam movement kalpui
ṭhin tan chuan thil inhmeh lo tak a ni. Ka dem lohna chu kum 2018 inthlanah BJP pawisa tel lovin khawia sum hmangin nge an campaign tak ang? tih hi an ngaihtuah lawk a, an fing ka ti. Tunah chuan chhim lama bial ṭhenkhat BJP ṭhatna leh khawthlang leh Kawnpui leh Kolasib hnaih lamah hian MNF-in BJP seat an kian ang a, kum 2018-ah Mizoramah BJP kaihhruaiin MNF hian tlin an tum a, chu chu politics thlir thiam mi a nileng lo tan chuan hmuh hmaih theih a ni tawh lo.

Hei tak hi political strategy fing tak a nih theih rualin political suicide a ni thei bawk a, chu chu hunin a la hril dawn a ni. MNF hian tlin phah nan an hman chuan an tifuh ang a, an tlin si loh chuan MNF ze ril Mizo rilru kal sana BJP hla thlan sa tura hruai luttu an hotute hi khuareiah dem an la hlawh ang. A nghawng lian tak tur chu ZNP lamin Congress an zawm ve mai tawh loh chuan kalna tur an nei lova, tun hnaia ZNP-in an tualchhung party pui MNF an beih duh dan en hian 'not normal' tia mipui hmaa inbei tawh party president pahnih hi chu an inchibai thei tawhin kei chuan ka ring lo.

MNF leh BJP ṭang dun, Congress leh ZNP ṭang dun hi kum 2018-ah sorkar an inchuh hmel ta a, "Keimahniin kan mal din dawn" tia hman ni lawka au MNF president tan NEDA dintu Modi leh Amit Shah-te thu lova mahnia kal theih a ni tawh lo. NEDA Convener Dr. Himanta Biswa Sarma hi pa ropui tak a ni a, Assam-a Congress lalna phet thlutu a ni a, ani hian Mizoramah sawi tur nei ve lo mahse MNF-te hi thu kam hnih khat a fah ngei ang a, hei hi AMC-a chak zo lo Congress tan chuan vei tham a nih ka ring. AMC sawi takah chuan MNF tan innghahna a la tling bik lova, a pumpui vote belhkhawma an chakna kha vote 200 bawr vel lek a nih vangin MLA panga aṭanga 21-a kaisang tur chuan an beih nasat a ngai dawn a, hetah tak hian BJP sum a pawimawh ang.

- Lalmuanpuia