NLUP sem chhuah a ni tawh chiah em?
Kan sorkar hrawn mek chuan term hmasa zawk aṭang khan NLUP hi a siamtu party mite hnenah a sem ṭan a, hotupa berin a sawi dan chuan tunah hian sem chhuah a ni tawh a, NLUP dawngtu, hmalakna la zo ve lote tan a chhunzawmna leh khaichhuahna ang reng atan NEP an tih, New Economic Policy chu an duang leh tawhin, hei hian an chhawmdawl leh dawn niin a sawi. Heng thil hi han ngaih mai chuan ṭha viauin a lang a, mahse a nihna takah chuan miretheite min bawl kualna mai mai a nih duh hmel hle awm e.
A nih leh NLUP hi kan sorkar hian a sem chhuak tawh reng em tih hi i inzawt teh hlawm ang u. Thingtlang khaw tam berah hi chuan sem chhuah vek a la nih hmel loh. He NLUP hi a dawng tur chuan Congress party a in baptist a ngai deuh roh tlat a. Phase tinah NLUP dawng tur thlan a nih dawn hian hmun tam takah chuan Congress party worker-te, in hrang hrangah lut lawrin, party enrolment lain, membership fee an khawn a, an ziak lut
ṭhin a. Henga an ziah luh theihte hnenah hian NLUP hi an dawn tir ṭhin. Party danga tui takte chu an luhchilh ve lem lova, tin, membership fee lo pe duh tlat lote chuan an la dawng lo.
Chutiang a nih laia hotupa berin ‘NLUP sem zawh a ni tawh’ a han ti ta mai khan mi a barakhaih deuh a, heng ang mi rethei ve tak tak, la dawng ve si lote hi a mangnghilh ta nge, a party mi an nih loh avangin sorkarna a chan hnu, mi zawng zawngte hotu a nih tawh hnu thleng pawhin a la hlamchhiah zui zel dawn tihna em ni zawk ang le?
NLUP hi kan hotupa hian a sawi ṭha em em reng a, hlawhtlin pui hlein a sawi reng bawk a. A hlawhtlin pui tak tak hi engzat tak awm ang maw? Thingtlang khaw tam berah hi chuan a hlawhtlin pui hi an beitham viau hmelin, khaw tinah hian han zawng ta ila, kut zungṭang thliah tham lek lek a ni fur awm asin le! A tir phata sem a nih phei kha chuan Congress fir tak tak hlir khan an han dawng a, entawn tlakin an thawk ang chu maw tih laiin engah chuan an chan lem hlei lova. A Phase II-na an sem meuh kha chuan an intlak ral deuh vek tawh awm e!
Ka han sawi deuh duah chhan pawh hi he NLUP hian kan Zoram mipui rilru sukthlek a tih chhiat tlat vang a ni. Tunah chuan mipui hian hna thawh vak aiin sorkarin a han sem leh mai ang tih hi an rilru put hmang a ni.
Kan sorkar hian mi rinawm tak, khaw tinah hian tir sela, NLUP hi an sem dan dik tak survey tir sela, an la sem ve loh, mi harsa tak takte thur chhuak se, BPL member tun thlenga la dawng ve lote pawh thur chhuak se. Hei hi mipui sorkar tih tur a nih hmel hlein a rinawm.
- Patrick Z, Chhingchhip