Mizoram Football ṭhan len zelna atan Grassroots Football!

Football khawvela thuneitu sang ber FIFA chuan ‘Grassroots football is football for everyone, by everyone, everywhere tiin a sawi. Kum 2013 khan Mizoram Football Association chu All India Football Federation hnen aṭangin Award for Best Grassroots Development Programme a hlan a. Mizoram Football Association in ram pum huap chawimawina a dawng hi a ropui hle a. India ramah hetiang lawmman dawng thei hmasa ber a ni nghe nghe.

Tun thlengin Mizoram hmun hrang hrangah Mizoram Football Asso-ciation enkawlna hnuaiah hian Grassroots Football training centre hi kalpui a la ni ta zel a. Mizoram Football Association hmalakna ti chak tur leh Mizoram a football tihhmasawn zelna tur atana kailawn pawimawh ' Grassroots Football Development Programme lian ber SSA - Tata Trust leh Mizoram Football Association te ṭang tlangin an din leh enkawl chu bul ṭan a ni zui ta bawk a.

Grassroots football hian tum a nei a. Mi tam zawk ten football tui pui se, player thar chher chhuah kawngah te, khawi hmunah pawh awm ila, mipa leh hmeichhia thliar hrang lo a, chi leh chi inthliarna tih bo a, sakhuanna leh tihdan phung in an lohna ten ramri kham lo a, football hmanga mi tam zawk thlun khawmna leh inzawmkhawmna awm se, mihring nihna leh zahawmna te inzahsak tawnin, kaihruaitu mumal leh enkawltu ṭha tak hnuaia football training leh inkhelh te a huam vek a. Sikul naupang zawng zawng IAS, Doctor, Engineer, MCS, Pastor etc te ni tur a beisei vek tur an nilo ang hian, Grassroots Football tel naupang te hi nakin lawk a professional footballer ni tur a beisei vek tur an nilo a, skills & technique ṭha tak nei tur a beisei nghal tur pawh an ni hek lo. Football ngainatna te, football tih hmasawnna tur atana an rilru ti ṭhanglian a, an zing aṭanga mi bik leh thiam bik te enkawl a, thiamna leh theihna chi hrang hrang an neih te tuai hnum a, local, block, district, state, national leh international level thleng a pho chhuah an nih theihna tur a kailawn hmasa chauh a ni. Grassroots football chu a hnuai aṭanga chhung lama chhoh zelna tur ṭanpuitu a ni.

Mizoram a Grassroots football project lian ber hian Football piah lamah Mizo naupang ten rilru sang tak leh inthunun theihna te, kan hnam rohlu - tlawmngaihna te, rinawmna te, huaisenna leh ram leh hnam hmangaihna te naupangte rilrua tuh ngheh a, insawizawina dik leh mumal tak hmanga naupangte rilru leh taksa ṭhantir te, naupangte'n ngaihsan tur dik ngaisang a, chin dan (habit) ṭha an ṭhanlenpui nana kaihhruai te, naupangte nihna tak leh talent haichhuah saka, kaihhruaina mumal tak hmanga an talent tihpunsak te bakah, an lehkha zirna kawnga tihchangkan te bakah Football chu an lehkha zirna kawnga phurna siamsaktu leh ṭanpuitu a nih theihna tura ruahmanna siam a ni.

Tun hnai kum nga chhunga Mizoram football ṭhan dan chhoh hi a lawmawm hle. Chutihlai erawh chuan inkhai diat dan mumal leh ṭha a ṭul takzet a. Chumi tur chuan khelmual chhung leh pawn lamah mi tinin mawhphurhna leh tihtur kan nei a. A players lamah chhum lo chat lo a player ṭha zawk leh thiam zawk an chhuah chhoh zelna turin Grassroots football tih hmasawn leh tih changtlun hi Mizoram football in a mamawh leh a hmalakna pawimawh tak a ni. Football hian ken tel a ngah a, tihtur ṭul leh pawimawh a tam hle. Mi tam zawk thinlungah football 'chi nung' tuh hmasak phawt chu tih makmawh a ni. Grassroots Football atanga bul ṭanna hian nakin lawka naupang te hun lokal zel turah, professional footballer nih theihna bakah football huang chhunga thil ṭul leh pawimawh chi hrang coach education lamah te, referee developement, marketing, management leh administrator nih theihna kawnga football a tuina chuan nghawng ṭha zawk leh rah ṭha zawk a hring chhuak thei a. Hei hi football-ah chauh pawh nilo, infiamna game dang leh discipline dangah pawh Mizoramin a mamawh chu a ni.

Mizoram a Football thuneitu leh enkawltu Mizoram Football Association leh SSA- Tata Trust te chuan Grasroots Football tihhmasawnna tur atan leh tih hmasawnna turin inremna thutlung (MoU) an ziak fel tawh a. He inremnaah hian thil lawmawm tak lo lang chu Grassroots Football Training Centre a Trainers te chu a lo berah AIFF D coaching Licence an neih theih nan MFA-in hma a lakpui tur hi a ni.

Coaching Education lamah Mizoram kan la hniam hle a. Hei hi tih hlawhtlin a nih hunah chuan Mizoramah coaching license nei an pung dawn tihna a ni a. Hei hian football ṭhanlenna kawngah awmze awm zawk leh kalphung dik zawkin Mizo naupang ten football training an neih theih phah dawn a, hei ringawt pawh hi ring taka kut benna tham a tling.

Grassroots Football Development kalpui zui tur hi pilot project a nih angin, Mizoram a district paruk ah kalpui phawt a ni a. A hlawhtlin dan a zirin District dang pahnihah pawh kalpui thuai theih a beiseiawm hle. District hrang hrangah training centre hi hmun 60 ah neih a ni a, centre khatah hian naupang 50 awm zel tur a beisei an ni a, centre tinah hmeichhe naupang tan seat 5 reserved sak an ni bawk. Training center pakhat hi Trainer leh assistant trainer-te'n an enkawl a. Naupangte'n football an zirna atana mamawh jersey, ball, ballboot, mawza, speed ladder, cone, maker leh ṭul dangte pek an ni a. Naupang te hriselna pawh endik ṭhin a ni ang.

Centre hrang hrang te enkawl tur hian commitee hrang hrang State level, District Level, Cluster level Management Commitee din a ni a, Centre hrang hrang kalpui dan leh an hnathawh te endik leh vil kawngah heng commitee te hian mawh an phur ang. Ruahman ang chuan District level leh State level-ah training center a naupang te pualin competition buatsaih ṭhin a ni ang a, heng competition a naupang talent nei
ṭha te hi Tata Football Academy a scout ten Tata Football Academy a awm tur zawnna atan an rawn hmang ṭhin bawk ang.

Training Center hrang hrang a naupang te hian kar khatah ni thum chhung an sikul banah training an nei ṭhin ang a. Football zirna mai ni lo, zirna (academic)-ah pawh training pek an ni dawn a. Naupang thiam bik leh chherchhoh zel tlakte chu Mizoram chhung mai bakah state pawnah pawh thiamna sang zawk nei tura an training theih dan tur zawn sak zel tum a ni.

- Hmingsanga