MIZOTE LEH HLA PHUAH - George L.Ralte, Nisarih Tlang

Mizote hi Pathian hian hla phuah lam ah hian thiamna min pe bik a mi le, Pathian biak inkhawmnaah leh khawhar in a Pathian fakna hla sa tur tam tak kan lo nei ta te, lengzem hla leh hla lenglawng sak leh ngaihthlak tur tam tak kan lo nei ta te hian hla phuah lam ah Mizote hma kan lo sawn tawh zia hemi aṭang hian a hriat mai awm e.

Amaherawhchu, tunlai ṭhangthar hla phuah ṭhin te ka ngen duh che u chu in hla phuah a a thu in hman dan chungchangah hla thu awmze nei lo hriat tur a tam ta lutuk hi fimkhr a ngai hle in ka hria.

Hmanah khan kan Mizo hla phuahtu te zinga langsar leh thawh hlawk tak pakhat Pu Rokunga (L) hnenah Mizote thu leh hla lam a hma kan sawn zel theih nan a ṭan latu pawl langsar tak mai Mizo Academy of Letters chuan Poet of The Century ti a hming phuah in chawimawina a hlan a nih kha kan la hre ṭheuh awm e, he chawimawina hi duh tawk mai lovin sawrkar lam a kan hotute khawtlang lam a kan hruaitute leh kohhran lam a kan hruaitu te pawhin kan mizo zing a hla phuahtute zingah an hla phuah azira chawimawi tlak an awm a nih chuan chawimawi hi i uar thar zel ang u.

Tin, hman aṭang khan kan Mizo zaimi ṭhenkhat ten an hla sak a phuahtu te leh a thluk siamtute remtihna la hmasa lo a mahni duh dan dan a hla thluk lo tih danglam ching an awm niin a hriat a, miin fimkhur leh uluk tak a hla an phuah a thluk pawh mawi leh nalh tak a an siam hi kan zai mi te hian zah sak hram ila, hla thluk ti danglam duh kan awm a nih pawn hla phuahtu te leh hla thluk siamtu te dil hmasak hi a fin thlak hle awm e.

Tunlai ṭhangtharte hian kan Mizo mi hmasa te hla phuah Pathian fakna hla leh ram ngaih hla mawi leh ngaihthlak nuam tak a an han sa ṭhin han hriat hian a lawm awm takzet a ni.

Kan Mizo zaimite in hriat atana ka duh chu hla awmze nei lo sak sak ai chuan Pathian fakna hla leh ram ngaih hla te hi sak uar ni zel ta se a ngaithlatu tan leh nangmah ni a satu tan pawh a ṭangkaina tam tak a awm ngei ang. Tin, kan Mizo zaimiten mipui hma a in zai dawn reng rengin hla sak tur in thlan chungchangah in fimkhur a ngai hle in ka hria, mipui a ngaithlatu tur tan leh nang mahni a zai tur te tan pawh a in tangkai pui tur hla thu in thlan thiam a ngai tak zet a ni. Hla hian mihring teah nasa takin thu a sawi thei a ni.

He ka thu ziak chung-changah hian mit tikham zawnga thu ka lo ziak a nih chuan chhiartu te hnenah ngaihdam ka dil a. He ka thu ziak aṭang hian hla phuahtute, zaimite leh he thu ziak chhiar-tuten hmasawn nan leh changkan nan a hmanrua tangkai taka in hman ṭheuh ka duh a ni.