Politics inlumlet a awm dawn em?
Kum 2016 kum chanve kan lo chuang kai leh tawh a, mipui mimir tan hun hi pangngaiin kal reng angin lang mahse political party tan chuan inthlan hi a 'hnai' tawh takzet a, kum 2018 atan hian an inbuatsaih a, bial hrang hranga candidate tur an inrem chhin tawh ang a, thutlukna lian tham la awm lo mah se kan ram kalphung tur hi chu anni kutah hian a awm leh dawn a ni.
Tunah Congress-in sor-karna an siam mek a, ṭum hnih chu hnehsawh takin an tling a, a el phak bera ngaih MNF hi inthlan hnuhnung berah rin aiin an tlachhia. MNF hi chuan Aizawl Municipal Corporation (AMC) inthlana hnehna an chan hi innghahna atan an hmang a nih chuan an tisual dawn a, vote zawng zawng belhkhawmah vote 200 vel chiahin an chak a, an tling hram hram a ni.
Congress zawk hi 'tla' thei an nih vangin an inveng dawn a, MNF hi chu tla sa tlin tum an nih vangin ral rel an thiam a ngai. Hetia en maia kan ngaihthah ṭhin ZNP leh MPC awn lam hi a la pawimawh leh dawn a, ZNP hian MNF lo hrim hrim an awn dawn a nih hmel tawh a, MPC hian AMC-a an kawppui Congress hi an thlawp leh bawk chuan Congress hian party dang pahnih hi an kawp dawn pawh a ni mai thei.
Mal din tuma inpuang tawh MNF hian 2018-ah an tlin chian tawh thu an sawi a, chumi hnuah BJP-te nen Northeast party inzawm khawmah an inziak lut a, BJP hnuaia awm angin a sawi theih a, chuti a nih chuan Mizoramah pawh BJP leh MNF inzawmin an ding dawn a nih hmel a, MNF leh BJP an inzawm chuan Congress pawh an ṭi sawt ngei ang.
Kum 2018-ah hian Congress+ZNP+MPC versus MNF+BJP inbeihna kan hmu mai thei a, hei hi a dik loh pawhin hemi ang deuh thuak hi a nih a rinawm a, MPC hawi lam tur hi ka hrethiam lo.
ZNP hi mal din turin an lian tawk lova, mah se Congress an zawm chuan ZNP member
ṭhenkhat chu an bang ang a, an kalna tur chu MNF lam a ni a, anni MNF lah BJP hnuaia thawk turin NEDA-ah an lo inziak lut tawh si a, nationalist inti tak tak tan pawh Congress leh BJP rimnam lo kalna tur a avang dawn a ni.
Political party thar, third front tih vel sawi hi a awm leh ṭan a, hengte hi a tak chang tur nge inthlan dang ang bawka MLA pawh nei zo lo tur leh ding leh ngam lo tur? tih zawhna hi hunin a la hril ang.
- Ramngaihsaka