Kolkata Airport
Mi fate chuan Kol-kata Airport ngat phei hi chu an hmu zing tawh ngawt ang! Ka hmuh ve dan han sawi ve tawp mai teh ang. Taxi-in Kolkata Airport ka pan a, zing dar 7 lek nimahse mi-hring an tam tawh hle.
Hnam hrang hrang - sap, vai, Mizo leh Chakma te nen lam kan awm a. Lengpui Airport pan turte ṭhutna chu an la hawn loh avang chuan ka
ṭhu a, ka hawi vel mai mai a. Mite incheina leh khawsak phung vel aṭang chuan cheng nuai khat ṭheuh chu an Bank Account-ah a awm vek a rinawm - mahse kei chuan Bank Account ka nei lo.
Thlawhna chhung pan turte Ticket lo endiktu nulate chu an nalhin an hmel ṭha hle a. An hna an tlinin an incheina pawh a nalh hle. Bialpa te an nei ve ang em, khawi khua nge an nih, ISL an en ve ang em, Arsenal fans an ni ang em, zin veivak an dawnsawn tawhte zingah star an nei ang em adt.
Thlawhna hnai taka han hmuh te chu a nuam ve ang reng khawp mai - kei thingtlang pa tan chuan. Mahse ka'n ngaihtuah ngun a, America, Paris, England, Burma adt te hmu miah lo hian ka fam dawn tih ka in hriat chhuah nghal avang erawh chuan ka chapo rei lo kher mai! Pathianin min dahna hmun apianga lungawi thei zel nih hi a va hlu dawn em tih ka hriat phah!
Airport-ah chuan Coffe no khat kha Rs 100/- an ti mauh mai, ka lei ngam lo! Kan thlawhna kha Air India a ni a, ei tur an rawn sem hlauh mai! Lengpui kan pan chhungin ka chuanpuite titi ka'n ngaihtla a, sum leh pai an neih hmelin an changkang hle ang tih ka ring nghal a. Ka rin aiin an lo hausa vek - Lengpui Airport-ah an private car-in a lo hmuak vek mai!
Car a hmuaktu nei ve lo te pawhin taxi an la a, an tlan liam zung zung mai. Engtin nge Aizawl panin ka chhoh ve nghal ang aw-tiin ka inngaihtuah a. Ka wallet zawr zetah chuan Aizawl panna khawp pawisa chu a awm a, mahse Lunglei kal lehna tur Sumo chuan man a la ngai si!
Chutia Taxi contri' pui tur ka melh lai chuan ka bula ṭhu nutling chuan a chuan chhohna tur car a chuang ve turin min sawm hlauh a, Pathian hnenah lawmthu ka sawi a. 'Tichuan Aizawl panin kan chho a. Tlawng lui kan kan lai chuan a kama nufa za - fapa 2 leh fanu 1 nei chuan rawra an lo chhu a. An rilru chuan mi hausa tak fapa - private car nei, thlawhna hmanga zin veivak theiah min ngai niin ka hria a; mah se ka ni si lo.
Airport aṭanga mahni in lam pan ṭheuh ṭheuh kan luhna tur in chu inthlau hlawm hle mai. Mahse thil pawimawh ber erawh chu Pathian awmpuina changa mahni nihnaa lungawi thiam nih hi a lo hlu ta berin ka hria.
- Rinfela Zadeng