Republican Presidential Nominee Donald Trump-an a pawm ta!

Mi tam takin kan hriat lohva kan post mai chu hei hi a ni. US Inthlanpuia Presidential candidate lian pahnihte hi an Convention-ah Vice-Presidential leh Presidential Nominee a puan an ni phawt a, ni thum ni-ah Vice-President atâna nominate hian a pawm chuan Nomination Speech a sawi ṭhin. A ni li ni, a tawpna niah thusawi hnuhnung berah Presidential Nominee chuan an nominate-na chu a pawmin Danald Trump-a chu Republican Presidential candidate a ni dawn ta a ni. Kan puang hmanhmawh mah mah ṭhin!

President a chuh dawn tih a puan khan contestant 15 dang hmachhawn tur a nei nghal a, chung zingah chuan Jeb Bush, Ted Cruz etc te ang hming hriat hlawh, mi tam takin Republican Presidential candidate ni tura an lo rinlawk an awm a. Tlâng sang tak lawn chhuah tur a nei nghal a. Tichuan, a candidate puite chu a mal te tein a bei a, a hnuaichhiahin a paihthla nghauh nghauh a. Republican Primary chu Popularity hmanga hnehna chan chu a tân kawng awmchhun a nih avangin a tumah hian a hlawhtling hle a nih kha! Amah nuihzattu tam kha a chih a, a chanchin chuan mi ngaihven a hlawh zual sauh a.

Republican Convention : Convention an ṭan a, pawnah buaina siam neuh neuh awm mah se, Party chhûng boruak a ṭha tial tial a. A ni tawp a lo thleng ta a, chutah chuan speaker pawimawh tak takin Donald Trump a nihna leh a zinkawng zawh an rawn sawifiah ta a. Republican Nomination Chairman rawn langin ani chuan Republican Party hian inlungrual takin Donald Trump hi an Party candidate atâna an thlanzia khawvel mipui hmuhah rawn tarlangin ani aia America-in a mamawh an awm lohzia sawiin Donald Trump a rawn zuar chhuak mawi hle a.

Angelina Jolie-i pa Actor lar Jon Voight chu big screen-ah rawn langin Donald Trump-a hlawhtlinna, a nihna dik tak, thil chhe siam
ṭhatu a nihna, America sipai hmangaihtu leh mi rethei dawmkang a, ṭhalaite hna siam saktu a nihzia film hmangin a rawn puang chhuak a. Donald Trump-a chu hnathawk mi, thil chhia siam ṭhatu a nih tuma hai theih rual lohvin a rawn tarlang ta a ni. American mipui, celebrity ngaisang reng renga nungte nunah chu chuan nasa taka thu sawiin ngaihsanna nen Donald, Donald... Donald tiin mipui an sahawk ta hum hum mai a nih kha!

Paypal dintu Thiel-a chuan Gay leh Repub­lican a nih thu chhuang taka puangin Donald Trump a rawn endorse a. Chu chuan Republican Party chhûngah mi tin tân hmun a awmzia an rawn puangchhuak nalh hle a ni. Chumi hnuah chuan kum 36 chhûng zet a ṭhian hnaivai lo ni tawh Colony Capital CEO, Tom Barrack a lo lang ve leh a. Politician an rawn lang ta lo! Tom-a chuan Donald-a nihna an hriat zen zen loh, chhûngkaw ngaihsak mi a nih ruala mi tumruh a nihzia an chanchin dawt ni lo hmangin a rawn puang chhuak leh a. Pa a nihna anga a hlawhtlinna chu a fate hlawhtlinnaa lang chhuak, tu tân maha hai mi a nih lohzia leh chhûngkaw pa a nihna kawnga a hlawhtlinna pawh a nupuiah a lanchhuahna dik tak, mitin hriat chu a rawn phawrh chhuak nalh hle a ni.

Chhûngkua ngai pawimawh mi leh hlawh­tlinpui ngaisang hnam an nihzia hria tân point pawimawh tawp a ni. Thiel-a hian Lebanese chhuak a nihna sawi langin Donald a hnuaiah mi tin an lenzia a rawn tarlang chhuak thiam hle. Chutah, a fanu chuam Ivanka a rawn lang ta, a va han sawi ṭha em! Hmeichhe vote mamawh a nihzia a hai lova, a pa hnuaia 40% employee chu hmeichhia an nihna leh an hlawh pawh mipa nen a inan reng thu rawn sawiin US Five Star Hotel a Gen. Manager hmeichhe pathum zinga mi hmasa chu a pa ruat a nih thu a rawn puang a. Hmeichhia a ngaih pawimawhzia a taka lantirin a pain hmeichhiate tâna a thawh hlawk dan thiam tak maiin a puang a, hmeichhe-ho tân Donald Trump-a chu mi ṭha tawpkhawk angin a lang ta a ni.

A pa hnuaiah US hmeichhiate chuan mipa hlawh ang zat an hlawh ngei theih nân hmalakna a awm tur thu a han sawi zui bawk a. A pa chu hnathawk mi a nihzia leh a hnuaia hnathawk tur mi talent thlan a thiamzia, engpawh thawk se, a hnuaia hnathawk tê ber aṭanga a lian ber thlenga a biak pawh a, an thusawi a ngaihthlak a, team anga hlawhtlinna an chan tawhna sawi chhunzawmin a pa nena rei tak thawk dun an nih tawh avangin a thusawiah dawt pakhat mah a tel lo tih America-in a hre si a, point a score lianin sawi zui a hlawh tak zet zet a ni. A pain mi baihvai leh hna nei lo, sawrkar tih dik loh vanga hna chân leh mangang a puihte a han sawi kual hnuah tunge Donald-a kha ngaina lo ngam ang a, buaina nei tuin nge hnar thei ang le?

Khawvela a duh ber chu a Trump Legacy niin tun hnai kum 8 liam ta chhûnga America economy tlakchhiatna chi hrang hrang leh tih dik loh avanga Middle East, Syria leh Libya buaina avanga a pa awm hle hle theih loh thu sawi kaiin businessman a nih laia sawrkar hnathawh muang leh sum uchuak senna ni si a taka a siamṭhat tarlang pahin a pa chuan a hmangaih ber Trump Company kal sana US chu dinhmun sang zawkah dah leh tura President nihna a chuh dan a han sawi chu - Politician sawi a ni lova, Company pakhata Executive Vice President thusawi a nih avangin dawt a sawi hian khawvelin an ring mawlh lova ni. Ivanka thusawi dikna nemnghet turin a hmelah dikna chhiar theih a ni a, Innocent a lang bawk si! A pa ngei chu ko chhuakin ani chuan Republican Party-in US Presidential Election a candidate atâna an nominate-na a pawm thu a rawn puang a, nomination speech a nei zui ta a ni.

Thusawi danglam chu : A hma chuan thu mak leh rorum pumpui a chham chhuak chamchi a, ka sawi lawk ang chiahin tunah chuan a thusawi ki a va danglam ta em! Tun hnaiah tual chhungah buaina an tawk a, hmun hrang hrangah chhiatna a thleng a, mipuite chuan humhimtu an nei lova tiin thiam takin America leh Middle East chu ram thim tak, buaina hmuna khatah chhuahin Donald Trump-a chu Law & Order nen President ni turin ṭhutthleng a luah dawn a. Chuti chuan hun ralmuangah mi tin kan cheng ang a, border khar phuiin hun ralmuan hma loh chu kan inveng him ang. Chutih rualin Trump Organization tâna Billion a siam ṭhin ang bawkin America leh a chhûnga cheng mipuite tân trillion dollar thawk chhuakin mipuite chuan tun hma ang khan thinlung uangthuang takin zalenna leh ralmuanna hnuaiah kan lêng tawh dawn a ni a ti ta daih a nih kha!

Hillary Clinton dik lohna, thiam lohna leh khawlohna zawng zawng tarlang nawnin heng zawng zawng buaina bul chu Hillary leh Obama niin an ni hian American mi leh sa nunna an hlut lova, hna lah pawn lamah thawn chhuak zovin ISIS an hmuchhuak a, Iraq buaina a chhahin Syria lah misual kutah a tluchhia a. China an ngam loh luat vangin pawisa kan chân a, NATO lah Europe ram dinhmun a chhiat avangin a tlachhia a, US bak pur tur nei lovin NATO vangin sum kan chân a. Iran hnenah nuclear ralthuam siamna kan pek bakah mipui sum hmangin pawisa tam tak kan pe a, Israel chu chhan thut ngai thei dinhmunah kan dah ta a nih hi, tiin a opponent hi a khing hneh mep mep hle a. TV a ṭan lam nei lo, a thusawi ngaithlatu tân chuan Hillary chu ram hmelma dik takah a chhuah hmin der a nih kha!

A hnuaiah chuan an thiltih kawnga expert ber ber nen thawk hovin Vice President ṭha ber nen America hi kan siam ropui leh dawn a ni a han ti a. Chu chu a hnathawh ṭhin dan an sawi a nemnghehna niin chutiang lama thiamna nei inti tân ngaihzawnawm takin a insiam a, mipui hmuhah erawh rintlak a nihna a tarlang chhuak thiam viau lawi si a ni. Ni e, mi tam tak chuan finna nei lo, Opportunist dik tak a ni min ti a. Opportunist awmzia kan man loh luat vang chauha sawi an ni. Hun ṭha inhawng a chuh thiam vang chauha sumdawnnaah pawh hlawhtling, risk la ngam a ni. Politician ten ram hi an siam ṭha tak tak ngai dawn lova, Political System hmanga siam ṭhat theih a nih loh avangin system pawna mi hian ka siam ṭha dawn ta a ni, a tih kan hriat loh luatah sapṭawng kan hriat, a awmzia kan man chiah loh kan lo sawi ve ta chhen a ni e.

Sawi tur a tam a, kan duhtawk ang. Eng vanga Donald Trump hi duh viau nge ka nih ka tih chuan The Four Horseman, ka thu post hnuhnung ber dawttu-ah khan a chhan leh vang chiang takin ka tarlang tawh. Mi pangngai, thil a chhiara a thu chhiar awmzia hre mi ni ngai tân chuan Donald Trump-a hi an duh lo thei lo tih ka chiang e. Kan ram pawh hi Politician-te hian engtikah mah an siam ṭha dawnin a lang lo! Kar leh Thawhlehni aṭangin Democrats Convention an nei ve leh ang a. Politician hlun, a thusawi dan pangngai reng khan thu a han sawi ve leh ang a, Zoram Politician-te nen danglamna nei vak hek lo, mipui bum leh thei tak ang maw?

- Lalremliana Pachuau