KMMTTP road leh compensation

KMMTTP kawng laihnaa compensation claim chungchangah rin thu leh ngaihdan sawi a tam hle a. Zoram mipuiten thu dik kan hriat hi ṭhain ka hria. Hetiang hi thil awm dan leh thu dik zawk chu a ni e.

A hmasa berin KMMTTP kawngah hian mi 165 hnenah compensation pek tura tih a ni a, mi 160 in an la tawh. Tunah hian mi 398 te hnenah compensation pek tur buaipui leh mek a ni a, Pass 398 zingah hian ram, in hmun, Biak In, school leh thlanmual te a tel vek a ni.

Tichuan, a la tawh leh a la la lote nen Pass hi a vaiin 554 chauh a ni. Hei lo pawh hi ram ruak a la tam mai. Vanglaini Dt 20.7.2016-a chhuak, phek 8-na Thlirna tih huanga Pass 800 awm anga a rawn sawi kha thu dik tawk lo a ni.

Tunah hian kan Chief Minister zah-awm tak, Pu Lal Thanhawla leh a Parliamentary Sec-retary Pu H. Zothang-liana te hma-lakna avangin compensation pek tur hi peih fel ṭep a ni tawh a, award siam tura tihna order pawh Lawngtlai District Bawrsap hnen a thleng tawh a ni. Kan ram hruaituten Land Owner’s te hmakhaw ngaia hna an thawh laia thu hre chiang tura hma la si loa rin thu ziah hi a pawi hle. Mi ṭhenkhatin dawt thu an sawi avanga Mizo mipuite rilru dik lo ta lutuk anga kan sawi fo ta mai hi chu a ṭha lo hle bawk a ni.

Lawngtlai District Land Owners’ Asso-ciation-te pawhin Mizoram mipuiten thu dik an hriat theih nan tiin Aizawlah ngei mai press conference vawi hnih kan rawn nei tawh a nih kha. Hetiang a nih hnu pawha thu dik a nih leh nih loh chhui hmasa loa mahni ngaihdan siam ni tawh lo se kan ti hle mai.

Ram ṭhang zelah kawngpuite leh rel kawngte pawh sial a la ni zel ang a, compensation te pawh ram neituten an la claim zel ang. Chung mite hnenah pawh kan sawi ve duh a nih chuan, thu dik sawi turin a hmunah te pawh kal ve a, thu dik chauh sawi hi ching ila a va ṭha dawn em!

- H.Remmawia

Vice President

KMMTTP Land Owners Association,

Lawngtlai District, Lawngtlai