TUN LAI MIZORAM THU LAR

Tun lai Mizoram thu lar ṭhenkhat chu kawlphetha, Hydel power te, Yoga leh Pathian Biak in thianghlima Pastor leh upa te ruang vui chungchangte hi a ni.

Kawlphetha chungchangah chuan Ṭhenphunga Sailo khan a Sawrkarin a tih tum Six Basic Needs-ah khan a telh a. A Sawrkar khan Bairabi-ah tui khuapa Mizoram hi Vairam aṭanga kawlphetha lei loa intodelh a tum hle a ni. India Sawrkar laipuia Power Minister ABA Ghani Khan Chowdhury kha a lungphum pawh a phumtir a, Inthlan leh khan a tla ta si a. Lal Thanhawla kaihhruai Congress an lal ta a, “Ṭhenphunga damlai lung phunsak ka duh lo” tih vangin an chhunzawm ta lo kha a ni a. Kum tinin cheng nuai sing hnih leh sang khat phai lam kawlphetha lei nan kan hmang ta zel zawng a nih hi.

Laldenga a lo sawrkar leh a, Ṭhenphunga Bairabi Project chu a rawn chhunzawm ta a. Sawrkar laipuia phalna dil ngai zawng zawng a la hman lo a, a lak kim hmain a sawrkar a tlu ta a. Zoramthanga a rawn sawrkar a, phalna lak ngai a lak hnuah vai contractor lian Bairabi kaia Tlawng lui khuap turin a zawng ta a, mah se a hmu zo lo. Bairabi tuikhuahin a chim pil turah ram nei an lo tam tawh a, compensation pek vek an ngai dawn a. Compensation pek zawh vek a, tui la khuap leh tur chuan vai contractor-te khan hlawkna an nei dawn lo. Chuvang chuan tun thlengin khuah lohin a la awm ta a ni.

Tunlai thu lar dang chu Yoga hi a ni. A chanchin hre tak takin chanchinbuah an rawn ziak a. Hindu ho lehkhabu aṭang te in an rawn ziak a; a bengvarthlak hle. Kan hriat thiam theih nan Yoga hmanga insawizawi ṭhinte chu Hindu KṬP, ṬKP leh SAY ang hi an ni mai. Mahse, kan Chief Secretary hlui M. Lalmanzuala chuan Hindu sakhaw lam a nih lohzia a rawn ziak leh vak ṭhin a. A ngaihnawm dan pawh a dangdai hle. Yoga chungchang rawn ziaktu R.E. Ralte leh Revd. Chuauṭhuama te hi an fakawm.

Tunlai Mizoram thu lar leh chu Pathian Biak In thianghlima Pastor leh Upate ruang vui chungchang hi a ni. Pathian lehkhabu Thianghlim, Bible-a Thuthlung Hlui leh Thuthlung Tharah te hian Pathian-in a mite hmangin kan tih tur leh tih loh tur tlangpui min zirtir a. Bible pumpuiah hian Pastor leh Upate Pathian biak in thianghlimah an thih huna vui tur tih kan hmu miah lo zawng a nih hi! Pastor leh Upate ruang Pathian biak ina kan vui lai tak hian Isua hi lo kal ta se, engtin nge min tih ang aw? Ṭhuro zuartute pawh kha a vau darh vek a, an dawhkante kha a namthluksak a ni tih Bible Thianghlimah kan hmu si a. Hruihrualin min hlap chhuak mai lawng maw le! Pathian hian biak ina vui duh lo Rev. Thansiama kha mark a pe sang hle lawng maw?

Isua pawh kha Biak inah chuan an vui thu kan hre lo va. Petera te, Johana te, Paula te leh khang lai Kristian mi ropuite pawh kha mawl fel takin an vui liam mai a rinawm hle mai. Lu tansak leh a letlinga khenbeh te an nih ve mai mai bawk kha! Mahse, Biak ina in vui thu ngaituahtute chu Pastor leh Upate an ni miau si! Tu te pawhin ropui kan duh ṭheuh si a. Isua anga ropuina leh lalna zawng zawng hlip veka inphah hnuai chu kan duh kher lo ang. A lal puan hlip a, ran thlenga a lo mu duh hi a entawntlak hle zawng a nih hi.

- Thianghlima Liannghawr