Biak Inah kan in vui reng dawn
Tun hnaiah Kohhran Upa leh pastor thite Biak Ina vui chungchangah inhnialna tenau a awm a, hman deuh khan he thu hi kan khel chiam tawh khan ka hria a, sawi chhuah thar a nih takah chuan sawi belh tur ka pai ve nual mai. "Biak Inah kan invui dawn a nih rau rau chuan, kan zavaiin i invui law law ang u," tih hi ka thu tlipna tur chu a ni.
Biak Inah hian kan in vui ta a, hei hi Bible behchhan a ni lova, kan tih ṭhan (practice) mai mai a ni a, hei hi Sapram lam tih dan kan entawn leh entawn loh lam kei chuan ka hre ve lova, Bible-ah Pastor leh Kohhran Upa bik Biak Ina in vui tur tih lam hi chu a inziah ka ring lo. He practice hi miin an ngaimawh a, thlak an duh chuan an duh hun hunah inthlahrung lem lova thlak theih a ni ang a, mahse Biak Inah Kohhran Upa leh pastor vui tawh lo tura rel theitu hi chu Kohhran Upa leh pastor-te bawk hi an ni a, kei chuan an rel ka ring lo.
Ka rilrua lo lang ta daih chu Assembly House-a MLA hlawh tihpun an rel kha a ni a, mahni hlawh zat tur rel ni na na na chu eptu an awm lova, ruling leh opposition pawh an inlungrual ṭhap a, MLA hlawh a pung ta.
Mipuiin MLA hlawh pung an sawisel a, ram pumin a dem a, mahse MLA hlawh chu tihsan a ni tawh tho tho a, a tihniam thei tura rel theitu chu MLA te tho an nih vangin a tihniam tur chuan an rel ka ring lo.
Pastor hian Biak Ina vui duh vangin he hna hi an thawk lova, hun puma inpe an nih vangin an zahawm em a, Biak Ina vui an phu niin kan ngai a nih hmel - a âwm tho mai. Kohhran Upa pawh hi hun puma Kohhran Upa tura Kohhran mipuiin duh taka kan thlan an ni a, Biak Ina vui hi âwmah kan ngai a ni ang. Kohhran member ni tura dam chhunga inziak lutte erawh Biak Ina vui kan ni ve dawn lo, âwm lovah an ngai a ni awm e.
Khi lam khi a tehtu tur an ni a, leia lo inthliar chi a ni dawn em ni Pastor leh Kohhran Upa te u, Biak Inah in ruang in lalut duh a nih chuan in rawngbawl sakte ruang pawh lalut ve law law ula, Kohhran member thawhlawm thawha inkhawm ṭhin ṭheuh
ṭheuh. Leia lo inthliar a, "Chumi chin chu Biak Ina vui tur," tih hi chu in ngam sak sak deuh lo maw?
Biak In hi tute emaw vuina atan kan hmang dawn a nih chuan inkhawm tura hnar in hnar si lohte taksa hi 'ruang' a nih hnuah in hnar bik dawn em ni? In taksa kha ruang a nih hnuah Biak Ina lakluh in phal a, Kohhran 'member' erawh in phal leh si lo ang maw? Biak Ina in vui vek law law hi ka duh dan a ni a, khawpuiah phei chuan in kan nei chepin kawt zawt kan nei si lo, Biak Inah kan invui dawn a nih chuan invui vek law law ila...
A nih loh chuan invui lo vek law law ila. A nih loh leh invui vek law law ila. Kan taksa Biak Ina lut tura duhtute hian, kan ruang an hnar a, anmahni ruang an lalut leh tho si. Thil ngaihtuah chik deuh, inhnialna tham a ni. Zu ang mai mai a ni lo; i ngaihtuah ang u.
- Zorammuana