Naupangte hmakhua - an dikna leh chanvo
Finna leh thiamna a sang tawh a, ram hla taka chanchin/ thil thleng te kan hre nghal ve zung zung thei tawh a nih hi. Chutih rual chuan dan leh hrai hriatna kawngah chuan kan hriatna a la bil hle hlawm si a. Kan hriat tawh angin Dan ka lo hre lova tih hi chhuanlam a tling tawh lova, dan kan hriat loh avangin mi tam tak chuan kan tawrh phah thei a ni. Tunlaia kan thu khel pakhat naupangte dikna leh chanvo, hetiang hian lo bihchiang dawn ta ila. Naupangte dikna leh chanvo hi rual u/ puitling zawkte hian kan hriat a hun.
Naupangte hian puitlingte ang bawkin dikna leh chanvo (Rights) an nei a, United Nations Convention on the Rights of a Child (CRC) 20th November,1989 khan neih a ni a. Government of India-in CRC hi kum 1992 , 11th December-ah a pawm ve bawk a ni.
Engnge naupangte dikna chanvo, tute nge naupangte chu? Naupang tih chu JJ Act 2006 in a sawi dan chuan nausen pianghlim aṭanga kum 18 la pumhlun lo chinte hi an ni. Naupangte hian India ram Dan pui (Constitution) ah hian dikna chanvo (Rights) chi hrang hrang an nei a, United Nations Convention on the Rights of the Child (UNCRC) in naupangte dikna leh chanvo a tarlan pali te :
1) Nun khawchhuah theihna chanvo (Right to Survival)
2) Hmasawn thei tura chanvo (Right to Development)
3) Venhimna chanvo (Right to Protection)
4) Ngaihdan leh thutlukna siamna a tel ve theihna chanvo (Right to Participation)
A chunga kan sawi tak ang khian naupangte dikna chanvo humhalhna tur dan thar Juvenile Justice (Care and Protection) Act 2000 siamin India sawrkar chuan hemi chungchanga hma la a, bawhzui tur hian scheme ‘Integrated Child Protection Scheme (ICPS)’ a duang chhuak a. India ram state tinah he dan hi hman niin Mizoramah pawh kum 2010 aṭang khan hmalak chhoh ve a ni. He ICPS hnuaiah hian naupangte dikna chanvo humhalh, harsatna leh venghim ngaite lo buaipui turin District tinah District Child Protection Unit (DCPU)/ Child Welfare Committee (CWC)/ Juvenile Justice Board (JJB) din niin, an ni hian tun dinhmunah theih tawp chhuahin hma an la a. Anni hnenah hian engtiklai pawhin an harsatna leh buaipui an ngaihna te thlen theih reng a ni. Hemi bakah hian naupang chunga hleilenna leh naupangten harsatna an tawh te sawi turin telephone No.1098-ah hian a thlawna biak pawh a hriattir theih reng a ni bawk.
A tawp berah chuan ka rilrua awm ka la hriat reng chu kohhran pakhat nuho chanchinbu-ah ‘I fate an dam em?’ tih Editorial ka chhiar kha ka bengah a la cham reng mai. Kan fa kan hmangaih em emte hi an him lo thei a ni tih kha thuziak khan min hriat nawn tir fo ṭhin. Kristiante chuan kan innghahna kan rinpui ber kan Bible-ah naupang chu a kalna awm kawngah chuan zirtir ula a upat hun pawhin a thlah lovang tih leh Lal Isuan “Naupang te te ka hnenah rawn kal tir ula hnar suh u” a tih hi kan hriat reng a pawimawh. Kan fa te, kan tu te hi hmangaihna nen kan enkawl a, an dikna leh chanvo humhalh sak tlat hi kan tih makmawh a ni tih i hre thar leh ṭheuh ang u.
- Joseph Pachuau
Bazar Veng, Lunglei