"Kan veng" kan chhiatpui
Mizote hmasawn theih lohna pakhat nia kan zirtirtupa min hrilh chu, "Kan veng" ngaihtuahna kan paih thei lo hi a ni a ti ṭhin. He kan veng rilru avang hian inkhel ennaah intihbuai kan cho a, ṭhenawma Mizo Kristian ve thote nen insual kan ngam a, a ruka kan duh em em zu zawrh pawh kan phal lo. Kan veng bil rilru paih theih loh nghawng hi Mizoram hian a la tuar dawn chauh niin a lang a, a la pawi hlein a rinawm.
Kan vengah chuan zu zuar lo se kan duh a, khawiah emaw zuar se, va lei ṭhin ila kan duh ṭheuh bawk si a, mi veng zawrh chu a hnawk kan ti lo. Mizoram tana ṭha loa kan ngai a nih chuan mi vengah pawh zuar lo se, tih rilru hi pu thei ila, kan venga zu zawrh kan duh loh chuan a zu zawrh hrim hrim hi duh lo bur ngam ila a dik ang. Tunah hi chuan zu zawrh dodal hreh si, kan venga an zawrh tur chiah dodal hian kan awmin ka hria a, a pawi khawp mai.
Whatsapp lama ka thu dawn pakhat hi a dik a nih ngai chuan Aizawla kohhran pakhat hian Zu Leina Card neite chu rawngbawlna hlihsak an tum a ni awm e. Hei hi tak tak a nih chuan kohhran hruaitute hi zawhna pakhat ka zawt duh a, "In vengah khan Sipai bang rawngbawltu in neih ka ring. Sipai bangte khan 'dan' angin zu leina permit an kawl ang. Mizoram puma zu khap burna dan hman a nihlai pawh khan zu hi an lei reng thei a ni.
Tunah hian 'dan' angin Zu Leina Permit hi Excise aṭangin a lak theih tawh a, chumi nei chu rawngbawlna in tihtawp sak dawn chuan in kohhrana Sipai bang zawng kha tihtawpsak ve nghal ang che u.
Ngaihtuahna zau leh awmze nei leh fing zawk hman nachang hi kan hriat a ngai ta. Kan veng tihthianghlim kan duh luatah veng chhungah innghirnghona kan chawk chhuak palh ang tih ka hlauh thu hi sawi ve a ngai a ni.
Tichuan, kan veng chu thianghlim se, mi veng chu ṭawp se tih rilru avang hian tun hmain kan venga zu zuarte kan han hnawtchhuak a, khawiah emaw an pêm leh ta tho a, zu zawrh an thlah chuang si lova an zawrhna an sawn mai a ni si a, mahni chauh inen hi tun hmaa kan pi pute zia kha chu a ni lo mawle.
Mizoram pum huapa ngaihtuahna sen a ngai a, kan veng rilru hi kan paih a ngai e. Dawrpui Veng hi Aizawla veng hlun leh changkang hmasa an ni a, "Kan Veng" aia "Kan Ram" ngaihtuahna an neih avang hian veng entawntlak an niin ka hria a, an rilru zauh dan hi zu duh vang ni lovin thuawih leh thlirna neih zauh vang a ni tih hi ka pawm dan a ni.