Traffic duty zing kar lamah

Sawi leh sel hlawh tak sikul ṭan hma chu kan han hmang ṭan ta a, ka huphurh aiin a lo nuam a, chhunzawm zel nise ka ti hle. Kan chhungkuaah hian zirlai pali an awm a, kan veng hi veng mawng lam a nih bakah, zirlai hruaina tur lirthei leh awmpui nei lo kan ni.

Khitiang khi kan dinhmun nimah se, kan fate hian chaw puar takin an ei hman a, sikul an la tlai miah lo. A chhan chu zirlai nei kan nih avangin kan hun hman dan kan thlak a, zing dar 6 velah chhungkua kan in pel suau suau a, a nuam hle. Zing dar 7 hmain chaw kan ei a, chaw eikhamah hun thawl ṭha kan nei a, chhungkaw thil pawimawh tam tak kan ti hman a ni.

Tin, keini chhungkua chuan sorkarin ruahmanna thar a siam khan kan ngaihtuahnaa lut hmasa ber chu 'Sorkarin ruahmanna a siam chu kan zawm tur a ni' tih hi a ni. Sorkar ruahmanna hi han zawm phawt mai ila, kan chhungkua kan lo buai deuh a nih pawhin kan insiam rem mai tur a ni.

Sorkar ruahmanna chu hmang chhin ila, a lo ṭha lo a nih chuan kan sawisel mai turah keini chhungkua chuan kan ngai. Hman a hmaah sawisel hi kan duh ve lo. Kan chhungkaw kalphung a lo buai deuh a nih pawhin sorkarin ruahmanna kan zawm anga, kan insiamrem tur a ni. Hman a hmaa sawisel hi khua leh tui ṭha chuan an ti tur a ni lo.

Hei erawh kan chhungkaw chuan kan hria, dikna kan nei a nih angin sorkar ruahmanna pawh nise, ram leh hnam tana ṭha lo, kan ram leh hnam chhiat phahna tur a nih chuan huaisen takin kan sawisel ang. Sorkar ruahmanna pawh nise a ṭul chuan kan dodal mai tur a ni.

Sikul kai hun tih hmaa hi zirlai nei chhungkaw tam tak, a tira duh lo tute pawhin sorkar ruahmanna thar hi ṭha an ti viauin ka hria. Mi ka zawt nuala, ṭha ti tak tak an tam hle. Tuna a dodaltu tam zawk hi chu, zirlai pawh nei lo, fa pawh nei lo an ni deuh berin ka hria.

Sorkar ruahmanna hi mipui pawhin kan tum chuan kan tlin tih a lang chho mek a, zirlai nei an fate sikul ṭan hun hmaa thlentir hman lo an awm lo. An lo awm a nih chuan an chhungkua an inenfiah a ngai ang. Zing dar 8 a sikul ṭan a nih hian zing dar 6:30 ah pawh tho ila, kan fate dar 8 ah sikul kan kai tir hman vek. Hei chu min hnial suh u, veng mawng a awm, lirthei nei lo kan ni a, keini pawhin kan fate sikul kan tlai tir loh chuan in hman ve turah ka ngai.

Thupui kan peh hel nasa tawh hle. Thupui lamah lut dawn ta ila, sorkar thupek mipuiin an zawm a, zawm turin an nunphung pawh an thlak a ni. Thupek petu sorkar hian a thupek zawmtute lakah hian tih tur a nei vein ka hria. Zirlaite'n dar 8 hmaa an sikul thlen hman tumin an kal a, lirthei leh mihring zing dar 7 vel aṭang chuan khawpuiah an tei suau suau tawh.

Kan hun hman dan kan thlak avang hian traffic jam hun pawh a inthlak lo thei lo. Chuvangin, sorkar hian a tlai berah zing dar 7 aṭangin traffic duty dah ṭan se, a bik takin sikul zirlai tamna lai velah hian dah thei se a duhawm hle. Tunah chuan traffic an duty har deuh avangin zirlai tan a him lo thei tlat.

Lirtheia fate hruaina tur nei lo tam tak kan awm a, kan fate hmun hla tak taka sikul an kal hlawm si, traffic police tel loa kawng an han kan ṭhin hi chu ngaih a ngam zan lo. Lirthei neite tan pawh traffic jam avangin an fate ṭan hunah an sikul an hruai thleng hman lo ang tih a hlauhawm a ni.