DEPARTMENTAL WORK KAN TIH HI

Construction work, hnà thawh tur, restricted tender, without call of tender, rate fix sâa inpek, through departmental work tihte hi mimal/páwl hnêna pêk chungcháng thû chanchinbû leh social media-ahte tunlai hian kan hmu ṭhìn a. Departmental work-a GST chhiah lâk thlengin sawi rîk a awm ta bawk. Chuvàngin, departmental work kan tih fo hi han sawifiah ṭhain ka hria.

Departmental work chu department-in contractor emaw ruai lova anmahniin an thawh hi a ni tih kan hre ṭheuh ang a. A thawh dàn leh engte ngê tih ngai tih hi sawifiah ngai lai chu a ni.

PWD-ah chuan departmental work-a hnà an thawh chuan JE/SA-te’n labour an ruai a, zíngah muster roll hming lamin ni tin attendance an chhinchhiah a, thla tàwpah labour-ho hlawh an sem ṭhin.

PWD-in labour an rawihna rate hi sorkárin minimum wage rate-a fix a ni a, vantlàngin hlawhfâ kan rawihna rate aiin a tlém daih ṭhin. Tunlai hian vantláng hlawhfa rate hi Rs 600 leh PWD labour unskilled rate hi Rs 420 a ni awm e; a inthlauhna hi skilled/mistiri-ah chuan a tam leh zual mai thei.

Hetih avàng hian miin local hlawhfà hlawh pe tur chuan PWD labour pakhat leh a chanve dáwn lai hlawh ang a pêk a ngai a ni. Miin local hlawhfà ruaia hnathawktûte hlawh a pêk zât tur muster roll labour rate-a chhut chhuak tur chuan a hlawhfa rawih aia tam daih thawk anga ziak a, hming lem a phuah chawp a ngai. A nih loh pawhin hlawhfàte’n an thawh tak tak aia ni tam tak thawk anga ziak a ngai ang.

Ni tin hna thawkte hming lamtu JE/SA khan thawk ve lo hming lemte kha hming lamnaa awm anga chhinchhiahin, ni tin hming lamtu signature a pêk a ngai ang. A hna neitu (contractor?) khan hna lian, rei tak thawh ngaiahte chuan an hnathawkte kha ni tin an lo chhinchhiah thlap thlap lem lo va. Thla tawpah JE/SA-te’n muster roll an close-in hming phuahchawp ṭeuh a ngai ang. Hna lian deuhah chuan cheng nuai tel fé muster roll labour hlawh anga chhut chhuak tur chuan hming tam fe phuah chawp a ngai ang.

Muster roll chu thla tàwpah JE-in a close a, SDO hnênah submit-in, SDO-in EE hnênah a submit leh a. Tichuan, EE-in pawisa draw-in SDO hnenah a pe a, SDO-in JE hnenah a pe leh ang. SDO hian muster roll-ah khan labour-te hlawh hi labour hnênah 'Keimà'n ka sem a ni' (paid by me) tiin certificate ziakin a signature a pe ṭhìn. JE-in labour-te chu ‘Keima'n ka identify a ni’ tih leh ‘Sunday benefit a la thei’ tiin certificate a pe bawk ṭhìn a ni. Labour-te khan an hlawh an dawng ngei tih chhinchhiah nan an hming zàwnah sign-tír emaw, kutzungpui nemtír emaw a ni ṭhìn. Hei hi labour hlawh chungchang a ni.

Departmental work-a hman tur material - lung, rawra, balu, cement, thingzai, etc te hi department approved rate-in approved firm aṭanga lei a ngai. Heng lei zawng zawng leh leinate hi a hnà neitu (contractor?)-te’n an lo chhinchhiah thlip thlep lo fo mai. Chuvàngin, phuah chawp bawka material supply bill siam a ngai ṭhìn. A supply-tute pawh hi supplier hran hran an nih khán a hna neitu (contractor?) tán bill lak a buai thlak avangin phuah chawp bawk a ngai ṭhìn.

Tichuan, departmental work tìa, tûte emaw construction hna thawhtír an nih chuan labour tam takte’n an ni tin hlawh muster roll-a chhinchhiah a nih anga an hnena sem ṭhìn ang kha a hna neitû khan a dawng ta vek a. Material supply bill pawh mi hran hran supply anga hming hrang hrangte bill kha a la ta vek ṭhìn a ni. Chutiang tur chuan labour tinte hming zàwnah labour hlawh la angin hming sign lem emaw, kutzungpui nemsak emaw leh, supply bill latûte signature kha a lema phuah chhawp ṭeuh a ngai bawk ang. Hna neitu kha labour zínga pakhat anga a hming ziak tel a nih loh phei chuan a hming a lang ve miah lo a ni.

Hna neitu kha eng zât rate-a thawk nge, eng zât nge bill sak tùr ni ta ang le? Contract hna pangngaiah chuan contractor-in a thawh ngamna rate-in a chháng a, chu chu approved a ni a. Contract rate a awm a, a hna thawh kha measurement là-in tehsak vek a, contract rate anga bill pêk mai tur a ni. A thawh tam leh bill a la tam a, a thawh tlèm leh bill a la tlém a, a thawh phú tâwk angin bill siamsak ṭhin a ni.

Departmental work anga mimal thawhtír a nih erawh chuan a thawh anga bill pêk turin tehsak a ni lo va, hnathawhna rate a awm lo. Chuti si engzât ngê an pêk tâk ang? Hnathawhna tùr atána department-in estimate an siam ang ang kha pêk an ni mai dáwn a ni. Chumi zât pe thei tur chuan muster roll lem, chumi zât hlawh chhuak thei tùr, hlawhfa zât phuah chawp a ngai ang. Chumi zât lâk theihna tur supply bill-te phuah chawp a ngai bawk dáwn a ni.

Department ṭhenkhat phei chuan work manager emaw, supervisor tih ang tein an hnà thawhtír kha an phuah chawp a ni àwm e. Departmental work-ah hetiang post hi a awm àwm lo mang e. Appointment order-te issue-in an appoint em ni le! Engtin nge an hlawh pawh an bithliah áw. PWD-ah chuan departmental work chu JE leh SA-te’n an enkawl ṭhìn.

Departmental work tìa mimal thawh tura hna inpêk hi a him lovin, a fel lo hle. Departmental work anga mimal hna an thawhtír chuan SDO, JE leh SA-te hi an duh reng vang ni lovin thil him lo tak tihtír an ngai ṭhìn. Hlawhfà rawih si loh hming lem, supply petû ni si lo hming lem leh labour awm tak tak lo signature lemte siam a ngai.

Departmental work aṭanga GST lâk tum thu pawh kan ngaithla a. Tu khan nge GST pe ang le? Department-in pe dáwn ta se department kutah hnathawhna sum a lût miah bawk si lo. An hna thawhtír (contractor?) kha han ṭhíng dáwn sé GST lâkna turin a hming lanna a awm dawn bawk si lo a ni.

Departmental work kan tih hi kan chiang chiah em áw?