Sum thianghlim lo Synod-in a dawng thei tawh dawn lo maw?

Kohhran hian a tih tur dik tak thuchhuah a siamah hian belh tur a la nei a ni. Kohhran dan zawm kim chhunga mite’n nupui pasal a rukin an nei a, thla ruk zet a thunun a. Ngati nge, ruihhlo zuarte hi a thunun ve si loh? An inkhawm a, thawhlawm an thawh a, an buhfaiṭham kan khawnsak a; target hrang hrang kan khawn a bâng chuang si lo. Eng chu nge sum thianghlim lo chu ni ta ang?

Ruihhlo zuarte chungah action la turin sawrkhar leh VDP, welfare, YMA-te kan beisei a. Kohhran hian nupui ru pawh a thunun si chuan ruihhlo zuarte hi a thunun ve tur a ni dawn lawm ni?

Kut kuangkuahin kan thlir liam a, kohhran sum báwm a kiam kan hlauh luatah hian sual kan vulh liam mek a nih hi. Buh lem leh buh tak kan ṭo za ngei mai, kohhran berin a thunun ngam si loh ruihhlo zuarte hian hnung lama min nuih tet tet hian ka ring ṭhin.

Zu leh KS kan vai a, Kristian rama awm atan a mawi lo ve, kan ti a. A mawi kan zawng a, kan mawi chuang si lo. KS an pung a, zu a tlem phah chuang lo va. Damdawi a tam tial tial a, kan ṭhalaite innghahna tlak loh an va tam ta em. Do tur ngah ram, do hlawh chham state kan ni. A huhoin kan do a, mimalin kan do leh si lo. Eng vanga heti tak maia HIV, AIDS pung chak bik ta em em nge kan nih?

Nawhchizawrhna hmun kan nei lo va, a remchan dan danin, hmanhmawh takin sex kan hmang a; chu chuan kan ram min suat mek a nih hi. Ram dang leh state dang angin nawhchi zawrhna hmun kan neih loh vang a ni. Kohhran kan vengthawng a, nawhchizuar kan neih loh phah chuang si lo.

Khawvel tharah kan chuangkai ta. Ram dang, state dangte nunphung angin kan khawsak thiam a ngai ta a ni lo maw? Heti reng reng hi chuan kan hnam hian ral lam a pan zel ang a, HIV positive kan pung zel dawn.

Sawrkar pawhin kohhran hi a ṭul chuan maimitchhinsanin, beng hupsan chang a neih a ngai; kan dinhmun hi a ṭha lo tak zet tawh a ni. Ram inrelbawlnaah hian kohhran hi inrawlh buai lutuk lo se la, kan ṭhalaite sûkthlek thlir chungin, kan khap rem theih si loh lakah hian kan inhambuai rei ta lua e.

Mimal zalenna kan zahsak a hun ve tain ka hria. Zu awm lohna hmuna zu in lo mi nih ai chuan, zu awmna hmuna zu in lo mi nih hi a Pathian thu em em. KS awm loh vanga KS mutpui lo mai chauh nih ai chuan KS kal pel thei ringtu kan ram hian a mamawh. Sualna hi kan ding leh veiah kal se la, Pathian mi chu ngil takin a kal mai tur a ni.

Thlemna tawk lo ringtu chu a chak ngai lo va, thlemna karah ding nghet turin Pathian chakna chu kan chakna lo ni zel rawh se.