CHHUNGKUA NGE I HMANGAIH RAM?

Chhungkua hmangaihtu chuan ram tan hna a thawk hman lo va, a mah leh a chhungte tan a hun a hmang zo va. Ram hmangaihtu erawh chuan a chhungte aiin ram chu a vei zawk a, ram tan a hun a pe zo ṭhin. Ram hmangaihna dâltu nia a hriat, a hmaa sum lo kalte chu a lo hnar ngam ṭhin.

Kan ei leh in te, kan silh leh fente siam chhuaktute chuan hmanlai ata tawh chhungkua aiin ram an lo hmangaih hmasa zawk avangin intodelh ram an lo ni daih tawh a ni. NLUP sem te, SEDP semte chuan ram hmasawnna a thlen pha lo va, mahni awmna party sawh nghehna leh chhungkua va dâwm kanna chauh a thlen ṭhin. Lo neitute thawh chhuah rah lo leisakna hian taihmakna te, chhungkaw tana ṭhahnemngai taka hmalaknate a rawn thlentir a, a la ṭha viau zawk a ni. Mahse, hei pawh hian ram hmasawnna a thlen pha lo.

Mahni thawh chhuah aṭanga hmasawnna chu intodelhna a ni a; sum sem dawn vanga hmasawnna chu hausakna a ni. Intodelhna hi hausakna aiin kan thlan zawk tur a ni fo.

Sum sem te, mahni thawh chhuah ni lo, mi dangte thawh chhuah rinna chuan rilru zelthelna te, thatchhiatnate a thlen a, sum sem dawngtu chuan awlsam taka sum hmuh leh an duh avangin sum sem ve thei lo party lo dingte chu an sawisel nghal mai tawh ṭhin. Zoram mipui hian sum hmuhna ringawt kan âtchilh a, sum ngah chu ‘hmelṭha’ kan ti a, kan pan ṭhin.

Kan ram pachhe tak, enkawl ngai tak hi a chhunga chengte’n kan hausak khalh a, mi ramte thawh chhuah kan neihte hmangin kan nawmsaksan daih ta mai hi a pawi em em. Kan ram hi kan enkawl hmasa ang a, a lo hnianghnar hunah kan ram chuan intodelhna min thlen dawn a ni.

Zoram hi a khawngaih thlak em em a, enkawltu a nei ṭha lo va, kan tichereu zel zawk a ni. Kan ram hian mi a châwm let theihna turin kan enkawl ṭhat a hun ta. Kan ram hi a chhunga chengte tana intodelh ve theihna turin hma kan laksak a hun ta a ni. Ram hruaitute chuan eng ber hi nge ram hmasawnna tur chu tiin ngaihtuahna fim an hman tan a hun ta hle a ni.