Minister leh kawng chhia tlawh

Aizawl leh Silchar inkar kawng pawimawh em em mai, kan nunna hnar (life line) ti hiala kan sawi, kan mamawh engkim kan phurhna kawng chu pawl ang mai pawh ni lo, sorkar anga siam ngaiin kawng an block hial kha a ni a, a zahthlak hle mai.

Kuminah fur a na em em tih kan hre vek a, kawng pawhin a dâwl seng dawn lo tih pawh hai rual a ni lo. Chuti chungah inhmakhuana awm hauh loa kawng chhia kan tuar hi chu, opposition party ruhkawl ni lem lo tan pawh an demawm a ni.

Eng vangin nge fur pui thleng tur hre reng chungah kan chak lakna ber an ngaihthah tlat hi le? Engineer-te pawh sorkar kalta MNF hunlaia mi vek an ni a, ministry thar hian an kut a phuar zawk em ni tih mai tur a ni. Harsatna lian tham hi chu a pumpelh theih tih hi mimawl ber pawhin kan hria. Hetianga kawng chhia min petu ministry leh PWD engineer-te dem loh theih an ni lo.

Tuna kal ngaihna awm lo khawpa a chhiat a, sorkar meuhin a chhe lai siam ṭhat a tum laiin kawng khar a ni a. Sebohnua sekawng khar an tih ang maiin minister-ten an han tlawh leh lawisi te kha eng teh ualah mipui hian an ngai lo. Hnathawk an dal mai mai a ni.

Aizawl khawpui pawh kan sawi angin MNF ṭhalai hnatlan ngai miah loin a chulmam theih. An ti duh lo mai mai a ni. Khawpui chhung kawng kha alkatra nen siam mam pul se kan ti lo. Khaw awmdan khan a zir lo tih pawh kan hria. Mahse khati khawpa kawng khuar nasa lutuk min chhawptu khan han ngaihtuah chiah ve teh se.

Alkatra nena mam a hun lo a, a khuar kal ngaihna awm lo kha lungin hnawh se, road roller khan an chil mam phawt mai se a zia tur. Khati khawpa rei kawng khuara min tlantir ringawt pawh kha a zahthlak a ni.

ZPM sorkar hi mipuiin kan beiseina a sang tih vote thlakah khan a lang. Congress leh MNF-ah mipui kan beidawng a, anmahniah beiseina sang tak kan neih vangin MLA pawh kan pek kha. Kha kha hre reng se. ZPM-ah kan beidawn leh chuan Mizoram chu kan hrehawm dawn em mai.

Chuvangin sum a awm tih sawi a ni a, hnathawh a awm bawk si loh chuan engtia kalpui tur nge? Mipui thinrim an tawng bua ang tih a hlauhawm hlel lo e.

- Lal Rinmawia