AMC leh ri bengchheng inhmeh lo
Tlem lai deuh khan Temple Corps-a dâr khâwng ri vul vul, a bik takin zan reh muttui tawh hnua ngaimawh tawk an awm avanga titawp tura hmalakna chuan beih a tawk hle mai. Damlo leh tar chak lo, zan lama muhil ṭha hlei thei lo tan chuan a ngaihmawhawm viau thei bawk e. Engpawhnise, ṭhenkhatin music-ah pawh heavy metal ring mangkheng an duh lain, music ri hrim hrim ngaitheilo an awm bawk. Chuvangin, kan ngaihmawh zawng pawh a inang vek awm lo ve. Kei ka ngaihmawh leh nin em em chu eng dang ni lovin, AMC area chhunga furniture workshop ri bengchheng lutuk thu hi ka han chhimthal bekang puah pui ve phawng phawng mai teh ang.
Veng tin deuh thawah hian AMC licence pek hmangin an duhna lai laiah furniture workshop an bun chawt zel mai niin a lang. Tunlaia an hman ṭhin thing zaina khawl, thing nawhna khawl, leh khawl dang dang furniture hrang hrang siam nana an hman ṭhinte hi a ri tih zawihna a awm bawk si lo va; ṭhenawm hnaia awmte tan chuan hnêawm tak hi a ni ringawt mai. Lungmuang thlamuangin TV a en theih loh va, ṭawng pangngaiin inlêng a titipui theih tawh lo va, chhungkua pawh ring lêng lâwnga inbiak a ngai zo vek tawh. Zan lama mu ṭha hlei thei lo, tar leh damlo tan chuan ânchhia a ni chiang khawp mai.
Furniture workshop ṭhenkhat phei chu hnathawh hunbi pawh an nei lem lovin a lang. Zing dar 6:30-a thawh ṭan bur bur chang an nei a, zan lamah pawh dar 10 pêla hnathawh chiam chiam an ching ṭhin. Ṭhenawmte’n an ning viau ang em tia inthlahrun chu sawi loh, ṭhenawmte tan ninawm kan siam lo vang tih hlau ang maiin thâwm an dîm lo ṭhin. Inthlahrunna an nei chhetê lo. Thenawmte an vêngthâwng miah lo bawk. Vai rama kan awm ve ṭhin lai kha chuan hetiang workshop/factory ang hi chu industrial area-ah chauh awm an phalsak ṭhin. Residential area-ah hi chuan hahdam lungmuanga khawsak kan thlahlel a nih si hi maw le.
Dan leh hrai lam thlir ila, Aizawl Municipal Council Licensing Regulations, 2012 hmangin furniture workshop atan license pek theih a ni. A pe theitu pawh AMC Chairman a ni a, Chairman-in Chief Executive Officer hnenah thuneihna a hlan chhawng thei bawk. Heng trade license hrang hrang pek chhuahna kawngah hian AMC Chairman hian thuneihna lian tak a nei. Section 7(b)-ah leh Section 10-ah hian workshop dinna tur hmunah chuan boruak chhia (density of population or pollution) leh mipui tana remchang lo, ninawm leh khamawm lutuk (public nuisance) avangte hian license pek a remti lo thei.
Vawk vulh mai mai turah pawh ṭhenawm khawvengte remtihna a ngaih si chuan furniture workshop meuh din phalna (license) pek dawn chuan ṭhenawm a tuartu turte remtihna (no objection certificate) hi chu phût ngei tur a ni. Local council-te hi chuan engmah tak tak an thlithlaiin a lang lo. A dil leh mamawh apiang hnenah remtihna an pe chhuak vel mai mai ni berin a lang. Chuvangin, AMC Chairman pawh hian hetia license dil an awm chuan an ṭhenawmte remtihpuina rawn la rawh u ti ṭhin se la a ṭha hle mai. Chu chu he dan pawhina a sawi tum chu a ni.
A tawp berah chuan, nilengin mahni eizawnna hmunah kalin hah leh rim takin hna kan thawk a, tlai lamah kan lo thlakhlelh em em, thlamuang leh hahdam taka chhungte nena chen ho kan duhna hmun ngeiah kan han haw a. Karei karei, kan thlamuanna leh hahdamna in ṭhin chu ṭhenawm hnaia furniture workshop inbun tharte avangin hremhmun notêah an lo chantir ta a nih hi maw le. Chhungkuaa hlim taka titi hote chu a hnai tawh lo. TV en dawn ila, full volume-a dah pawhin kan hre thei meuh tawh lo. A ring apiang boral lo tur an nih chuan ṭhenawmte hi chu an boral lo chiang ngawt ang. Sorkar holiday kan nghahhlelh em em ṭhinte khan awmzia a nei tawh miah lo. Tun hma lama power supply kan neih loha kan phunnâwi ṭhinte kha tunah chuan hahdamna min petu zuk ni ta mai mai chuan. Kan khawvel hi a letling nge, a linglet tih pawh ka hrethiam tawh nek lo ve. AMC hotute u, ṭhenawmte kan intualvuak hma ngei hian hma han la thuai thuai teh u.
- Hmangaihi pa