Sorkar hmalakna hriatthiam

Democracy ramah chuan sorkar hi mipuite ta, mipuite siam leh mipuite tana siam a ni an ti ṭhin a. Chu chu India rama kan sorkar lungphum pawimawh tak pakhat pawh a ni. India rama awm kan nih angin, Mizoramah pawh kan state sorkar hi mipuite ta a ni a, mipuite siam a ni a, mipuite tana siam a ni.

Kan Bible-ah chuan roreltute chu Pathian ruat an nih thu leh mipuite chu roreltute thu thua awm tura tih kan nih thu kan hmu a. Ni e, roreltute thu awih thiam hi a ṭha a, a Pathian thu em em a ni. Chutih rualin, roreltute hi Pathian ruat an nih rualin, an rorel zawng zawngte chu Pathian duh dan a ni vek kher lo ve bawk. Chutiang hunah chuan, roreltute'n Pathian duh dan lo zawng emaw, mipuite tana ṭha lo zawk tura ro an rel chuan sawisel leh dodal a thiang ve bawk awm e. India danpui hnuaiah kan duh zawng sawi tura zalenna kan neih ve bawk kha maw.

Tun hnaiah Mizoram sorkar leh Aizawl Municipal sorkar-te'n thil thar tih an nei zauh zauh a, chung zingah chuan mipui náwlpui nghawngte pawh a awm nual awm e. A bikin tun hnaiah chuan Mizoram sorkarin sikul kai hun a sawn hma leh AMC-in maxi-cab stand-te khawpui daiféma a sawn chhuahte hian sawi a hlawh phian mai. Hengte hi a ngaihtuahtute'n uluk leh ngunthluk taka an ngaihtuah hnua an thutlukna a ni a, mi ṭhenkhatin harsatnate an lo tawh phah a nih pawhin, ram leh mipui náwlpui tana ṭha zawk tura an ngaiha thutlukna an siam a nih ngei a rinawm.

West Bengal sorkarin TATA company hnena Nano car siamna factory dinna tur Singur-a ram a pek kha mipuiin an dodal a, an dodalna lamah thih phah hialte pawh an awm a. Mipuiin an dodal nasat em avangin TATA lam pawh an inhnûkdâwk ta nge nge a. Gujarat sorkarin an state chhungah hmun ṭha tak a lo pe a, TATA pawhin factory dinin, NANO car an siam chhuak ta chur chur a; an car siam chhuah chu mipui tam takin an hmang ṭangkai mek a ni. India ramah hian kawlphetha siam chhuahna tura lui khuah a nih dawn hian lui khuahna tur bul hnaia mite'n an dodal fo bawk a, Mizoramah pawh dodalna a awm ta zeuh zeuh.

A chunga sawi ang khian, sorkarin ram hmasawn zawkna beiseia thil thar a tih hian sawisel tawk hi chu an awm reng dawn. A tlangpui thuin sawiseltute chuan mi náwlpui, mipui tam zawkte ṭhatna tur aiin, anmahni hamṭhatna an ngaihtuah fo bawk niin a lang. Sorkar mai bakah, kohhranin emaw, NGO-in emaw thil ṭha zawk beiseia kalphung thar leh tih dan thar an kalpui hian sawiseltu hi an awm ve fo hrim hrim mai.

Sorkarin hmasawnna tura thil thar a tih a, hna a thawh hian mipui nawlpui tana ṭha tur ni mah se, a tuartu an awm ve fo a. A tuartu mi ṭhenkhat an awm vang ringawta ram leh mipui tam zawk tana ṭha tur chu tihzûzî mai chi a ni si lo. Chuvangin, a tuartu tlem azawng an awm a nih pawhin, thil ṭha tur chu kaltlangpui ngam a ngai fo ang a; dodalna karah pawh huaisen taka thutlukna siam a ngai foin a rinawm.

Chutiang zelin, state sorkarin sikul ṭan hma a ti hi Mizo ram leh hnam kal zel tur atan thil ṭha zawka a ngaih a ni ang a; zirna leh naupang enkawlna kawnga mithiamte'n uluk taka an ngaihtuah hnua an thutlukna a ni ngei ang. He thil hian mi hausa leh rethei a thliar hmel loh a, an tawrh dan leh ṭhatpui dan tur a inchen vekin a rinawm. Mithiamte'n uluk taka an ngaihtuah hnua an thutlukna a nih avang leh, sorkarin ram leh hnam tana ṭha tura a ngaih a nih avangin, a ṭhatna hmuchhuak thei turin i hmang zel phawt teh ang u. Mipuite pawh i insiam rem zel teh ang u.

AMC-in Aizawl daifema maxi-cab stand a sawn chhuah hian miretheite emaw, thingtlang mite emaw tawrhtir a tum vang a nih a rinawm loh. Mipui náwlpui tana ṭha leh him zawk tura a ngaih vanga sawn a ni zawk ngei ang. Mipui mimir tana ṭha zawk tura a ngaih chu a tuartu emaw, harsatna tawh phah emawte chu an awm mahna. Mahse, AMC hian ram, hnam, khawpui him leh nuam zawk, mipui tam ver tana ṭhaa a hriat chu kalpui zel teh se. Chutih rualin, zing dar 6-a maxi-cab chhuakte'n khawpui chhungah harsatna an siam lo niin an sawi a; chutiangte a nih chuan zing chhuakte chu ngaihhnathiam a ṭha tho thei bawk. Hetiang hian AMC hi a kal mek niin a lang a; a lawmawm hle a ni.