Leimin a tam leh dawn e!

Khua a fur leh ṭan dawn ta a, leimin avanga in chim leh kawng ping a tam leh dawn. Hetiang hunah hian kum tin Mizoram hmun hrang hrangah lei minin kawng a hnawh pin leh in chim avanga thihna a thleng fo a, hetiang chhiatna lakah hian kan fimkhur a ngai a, fimkhur chuan chhiatna tam tak kan pumpelh thei dawn a ni.

Ruahtui tam hun a lo thlen hian sorkar pawh a theih ang tawkin a inbuatsaih ve ṭhin a, Supply de­partment-ah mipuite tan silpaulin a sem chhuak kum tin a. Amaherawhchu, hetianga in hmakhua hun a thlen pawha in buatsaih lawk nachang hre lo hi mi tam tak an la awm avangin fimkhur tura in hrilh hriat hi tun aia kan uar deuh deuh a ngai a ni.

Tun dinhmunah hian mitinte hi kan fimkhur tlang viau tawh emaw kan ti a ni maithei e, mahse chhiatna a thlen dan leh chhiatna kan tawh tam tan uluk taka han zir chian chuan Mizoram mipuite hi kan la fimkhur tawk lo hle tih a lang. Fim­khur nachang hre tura in hrilh hriat hi tun aia kan uar a ngai a, sorkar pawh hian silpaulin semah hian duhtawk mai lo se, thingtlang chauh pawh ni lo khawpuiah pawh hian fur lo thleng tur atana inbuatsaihna hi uluk taka kan neih theih nan awareness campign ngawrh lehzuala a buatsaih a ngai a ni.

Ṭhal laiin ni se kan fimkhur tawk loh vang leh kan ngaihsam vangin in tam tak kan tikang a. Meilam kan sial thatchhiat avangin buai lohna turah mi tam tak kan buai a,

ṭul loah ram zau tak tak kan tikang kum tin bawk ṭhin. Hetiang hi kan dinhmun a nih vangin sorkar hian fur lo thleng tur lakah pawh hian ruahmanna awm sa aia ṭha zawk a siam a ngai ta a ni.

Mipui hrilh fin hi thil huphurhawm tak angin lang mah se Mizoramah leimin leh in kang a tam dan en hian tuna ruahmanna awm sa ringawt hi chu a tawk lo tih a lang reng.

Mipuite pawh hian chhiatna pumpelh turin thu kan awih ve pawh a ngai hle a ni. Tui luan kawr ṭha tak neih a pawimawh a, chutiang bawkin in leh a velah tui leh ruahtui luan luh theihna kua a awm chuan leimin hlauhawm tak a thleng thei bawk.

Tuihawk luanna tur kan siam thatchhiat vang leh ruahtui luah luh theihna lei kua kan ngaihthah avanga in hial a chim fo dan chhut hian kan fimkhur tawk loh vangin chhiatna tam zawk hi a thleng a ni tih a lang reng.

Chuvangin, that­chhiat vang leh ngaih­sam vang mai maia chhiatna kan tawh ṭhin titawp turin fimkhur takin fur lo thleng tur hi i hmuak ang u.