Insawisak rawn

Insawisak rawn tih rî hriat ringawt pawh hian thin a tiur a, a huatthlala em em. Tin, insawisak rawn tih hrim hrim hi a ṭhing lutuk tawh a, a zahthlak bawk.

Kei pawh, hmeichhe pakhat daw-thei lutuk leh rilru chhe lutuk vangin pawl pakhatin an 'rûn' an office-ah min sawisak rawn tawh. Ka hneh emaw, hneh lo emaw, a mal emaw, a huho emaw pawha ka hlauh miah lohte’n a huhoa nuam ti taka min khawih rawn phuba ka la duh miah lo leh, ka thinur miah lo chu ka tan a lo ṭha zawk daih a, an tan a ṭha ve kher em, ka hre lo.

Mi pawimawh emaw, pawimawh lo emaw, mahni mihringpuite chunga ṭhianho emaw, veng angin emaw, pawl angin emaw, khawlaiah emaw, in chhungah emaw insawisak rawn hrim hrim hi a hutthlala em em a, a tenawm a, dawihzep hna a ni. Thimthamah emaw, mi hnung lam aṭangin emaw, mi inring lo lai kut thlak chawrh nen a inang reng. Hetiang thil vel leh sawisak rawn tih vel hi ka tawng zing hle lehnghal a; thi paihin vawi hnih min paih tawh! Ṭhenkhat chu ka testimony angreng pakhatah khan ka ziak nghe nghe.

Tun hnaiah mi sawisak rawn ri ring tak chuan sawi a hlawh hle a, a khawih rawntute chawp leh chilha bail-a chhuah nghal pawhin mi ṭhenkhat mak tih a hlawh hle bawk.

Dan hre lo mi mâwl ka nih angin zawhna mâwl ka'n zawt teh ang. A tuartu tana na tak leh thinurthlak tak insawisak rawn, nunrâwnthlak tak ni bawk hi rang taka in bail theih case a lo ni reng a ni maw? Chuti a nih chuan a tuartu tan, dan leh roreltu chungah rilru a va na duh dawn ve. Ṭhenkhat, mi rilru dam deuh nana ni khat pawh jail-a lut lo va, ṭhenkhat rei tak tak jail an tâng si hi eng nge a awmzia? Bail an dil ve loh vang nge, police-in case an ziah luh dan azir zel zawk? Nge, a mihring azir zawk? Bail theih case nazawng hi bail nghal zung zung theih a ni kher em ni? Ṭhenkhat rei tak tak an buaipui si hi a va mak ve!

Dan reng reng hi roreltute’n dan bawhchhe lutuk si lovin, an duh dan danin an pawt sâwi thei tih chu kan mit hmuh leh beng hriatah a lo lang fo tawh. Mahse, roreltu ṭha leh fing chuan thutlukna a siam dawnin, a tuartu leh mipuia nghawng a neih dan azirin uluk tak leh fimkhur takin thil a ti ṭhin. Tun ṭuma rorelna thutlukna hian dan leh roreltu leh sawrkar chungah mipuite hian thlamuanna leh rinna an nghah ngam loh phahin, roreltute leh dan reng reng hi rin ngam leh innghahna tlak leh thlamuanpui tlakah an ngaih loh phah mai lo maw? Chu chu roreltu awm chhan leh, dan leh dan awm chhan a ni lo a ni lo’m ni? Dan thuhmun hnuaiah rau rau hian mi rethei leh mi hnuaihnungte hi dan leh roreltuteah hian kan thla a muang ve thei lo zawng a nih hi le.

- K Hmingthankaia