Mizote leh customer ngaihsak
Hman deuh khan Mizo zingah office hnathawk te'n anmahni dawrtu mipui te an ngaihsak tawk lo ṭhin hle nia sawi kha a awm nasa em em a, khatiang taka sawi a nih takah kha chuan tlemin han reh ve deuh mahse tunhnaiah office hnathawk te laka lungawi lo sawi tur tingin an awm ve leh ta zeuh zeuh mai a, a zialo hle a ni.
Kan sorkar office-a ṭhu tam tak phei hi chu ṭi tak chungin kan bia a, en pawh min en mang lo chunga peih leh peih lo a a rul tawk chiaha min chhang hi an tam em em a, an hmel ringawt en pawh kha mood ti 'off' tham a ni.
Ṭhalai lehkhathiam zawk leh ningkhawng man zawk an lo chhuak zel a, an ni ho dawr hi chu a zia ṭhin khawp mai. Mahse, kan sorkar hnathawk senior zawkte hian hmana an zia ṭhin kha an paih bo thiam lo em ni aw tih tur a la ni tlat hi chu a zialo ngawt mai, nuam ti taka an hnathawh ang thawk duh ṭhalai lehkhathiam an tam tehlul nen hian.
Ṭhalaite hnathawk peih lo tia an sawi ṭhin hi kan thawk peih lo a ni lo a, kan nu leh pa sorkar hnathawk ten zelthel taka an thawh hi rim taka thawh chak hi kan tam em em a ni.
Hmanni a Bank pakhat kan dawrnaah phei chuan putar pakhatin ṭawngkam pangai taka amah dawrtu kha, " i lo sawi ve tur a awm lo," tiin a chhang a, a zialo hle. Kan office hnathawk te hi an hahin an chau em em ṭhin tih kan hria. Toothpaste model ang maia nui sang chunga min lo mikhual turin kan beisei a ni hran lo a, ṭha taka customer te lo dawnsawn erawh an tih tur a ni tih kan office nghak te hian hria se, anmahni dawrtu mipui te tham lo leh zah lo taka min biak hi bansan se ka ti ngawt mai.
Kan ṭhianpa pakhat bank account siam tum phei chu 'a khawihtu inneihna a a kal' vangin ni hnih ngawt a kal thlawn tawh bawk.
A tawp berah chuan mipui lam pawhin kan zir a ngai hle, ṭhiante bula phun lungawi mai ṭhin hnam kan ni a, kan lungawilohna leh dik zawkna ngei ngeiah hi chuan a ṭha zawk hmuhchhuah beiseiin ke pen khat tal i pen ngam ṭhin ang u. Ṭhenawmpa leh kawmthlang nu hnena kan lungawilohna sawi mai maiah hian i duhtawk lo ang u.
Media chakna pawh hi a ṭha lo zawnga chanchin thehdarh lamah ni lo in mi diklo leh siamṭhat ngai te siamṭhat a nih theih nan hman dan i thiam ang u.