Mafaa Hauhnar vs Revd ChuauṬhuama

A hua hua chu an ni mai, tih hi phaw atan ka rawn hmang ve ngawt a, rilru zau tak pua in lo chhiar ka beisei. Vanglaini phek 8-naa Thlirna article rawn ziaktu zinga mi pahnih chanchin ka sawi dawn a ni.

Mi fingte ngaiha fing lem lo tak Pu Chawngkhupa kha Pathianin Thlarauin a thuam a, mifingte ngaihtuah chhuah zawh loh a ngaihtuah chhuak a. Pu Chawngkhupa hla phuah chanchin hi mite hriat hlawh Pu Mafaa Hauhnar-in Vanglaini-ah thiam takin a rawn ziak a ni.

He khawvelah hian mi chi hnih an awm - Thlarau mi leh Tisa mi. Pu Mafaa hian Pu Chawngkhupa hi 'Thlarau mi' tiin a sawi a, amah hi eng ang mi nge a nih ka hre lo a, a eng zawk zawk emaw chu a ni ve ang a! Thlarauin a tlawh zen zen pawha ka rin loh, Pu Mafaa hian Pathian thu leh hla chungchang a rawn ziak teh fo a. Hetianga Mafaa ziak fung nawr kaltirtu hi eng pawh chu lo ni se a ziak ṭha thei viau lawi si!

Chutihlaiin Bible nena insi reng tura ngaih, Koh­hran rawngbawltu lar leh hlun Revd Chuauṭhuama hian politics a tuipui viau thung niin a lang a. Kei lah pek hi inkhawm tlem tih takah Pu Chuaua hi thlalak bak ka la hmu lo. Democracy par tlan kan ni bawk a, miin a rilrua awm a ziah chhuah hi a thiang turah ngai ila. A ziaktu ziah awm a nih leh nih loh lam lo ham strict viau turah ka inngai lo a, chhiar­tute zalenna a ni zawk ang chu.

January thlaah Pu Mafaa Hauhnar-in a la ziak ve ngai lo a, February aṭangin khaikhin ta ila. A ṭul a, min chhuahsak duh dawn bawk chuan quarterly ang zawng pawhin a ziah theih ang a; hemi vang mai mai hi chuan kan writer-te hian an thu ziah leh tur topic thlak lo turin an tuang a chhah tawk ngei ang.

February-ah Pu Mafaa'n hla phuah leh lehlin thiam Lalmama hla phuah, “Thlah lovin ka vuan tlat zel ang a, Lallukhum hlu chu ka la chang ang,” tih leh Kristian Hla Bu an ennawn (18th Edition 2004) chungchang a rawn ziak a. Pu Mafaa ril rem lo zawngin Hla Bu siamtute hian an dah nge ni a, Biakinah a zai titui lo khawp hla thu a hmu zawk?

Revd Chuauṭhuama chuan Central sawrkar lam aṭangin faina beihpui thlak a hluar thu te, fai kan tumna kawngah laiking pawnpui tah tur ang mai kan nih a hlauh thute leh Mizoten faina ngai pawi­mawh tura a duh thu ṭha­hnemngai takin a sawi.

March article-ah Pu Mafaa'n duhsakna kut ding­lamin Zofate Kutpui chibai min buk a. Kan chap te châr hman hlawm tak maw... tia zawhna siamin Chapchar Kut hla pakhat a rawn ziak chhuak bawk a; heti taka lung kuaia a rawn ziah avang hian Kut hmang nasa ber zingah a tel ngei pawh ka beisei.

Pu Chuaua chuan mi tam berin hnute hnek leh nau vei an khel meuh tawh loh hnu March issue-ah pawh Kelkang harhna leh harhna dang mak leh dangdai deuh deuh hi engtia dawnsawn tur nge tih a beramte hnena hrilh hriat lam buaipui loin zu a la rawn rui ta tho a. Kohhran mipuite anmahnia intawng harh turin a duh nge, a thuziak en hian khawvel thil dang vei a ngah viau a. Sorkar thlawp lo zawngin thisen chhuak lo deuh chauhin a tlangau a. Kei ang ruh la no deuh tan chuan rawngbawltu hlun a nihna ai mahin kohhran tana zu dotu a nihna hi a langsar zawk mahin ka hria.

Pu Mafaaa April article hmasa ber chu Mizoramah Kohhranin thil a tihtheihzia leh mi hla phuahahte thleng pawh Kohhranin 'theihthawh a bawl' foa a hriat thu a sawi a; 'theihthawh' hi Mizo ṭawng a ni turah ka ngai a, mah se ṭhalai tam berte chuan 'theihthawh' awmzia kan hre lo! Eng pawh sawiin ziak se, Pu Mafaa thu thiamzia erawh hi chu a ril a ni.

April issue-ah Pu Chuaua chuan Brig. T. Sailo chanchin a rawn ziak a. Chanchinbua a thu ziakte Brigadier-a'n ṭha a tih ve hle ṭhin thute sawi chhawng a, Brig. T. Sailo hnen aṭanga thil ṭha tam tak a zir chhuah thute a sawi. Brig. T. Sailo a ui thu pawh sawiin Mizo zingah amah ang an awm leh zen zen a rin loh thu a sawi a. Pu Chuaua thuziakhoah hian amen han pek hluaina tur a la vang deuh. Mahse mithiam leh rawngbawltu hlun Pu Chuaua'n min la ho thei hi kan vannei mang e.