Bûk tlak kan ni hlawm ang em?
September 23, 2024 Vanglaini chhuakah khan 'Champhaiah bûkna dik lo an man' tih thu kha ka lo chhiar a, ngaihtuah a tithui hle mai. Mizoram hmun hrang hranga bûkna hi endik vek ni ta se, bûkna dik lo eng zat tak awm ang maw?
Champhai khawpuia chawhmeh bazarna hmunpui ber–Champhai Bazarpuiah bûkna dik lo, non standard spring balance pakua leh beam scale (kg. 2) pakhat an man a; bûkna 10 zet a awm tihna a ni.
Thil dik lo titute man chhuahna kawnga hma latu Champhai district civil supply officer CC Sakhawliana, Legal Metrology department, YMA Sub-Hqrs. Champhai leh MHIP bakah Champhai Consumer Union te an fakawm hle.
Champhai DCSO hian bazar leh dawra bûkna leh tehna hmante chu a dik leh dik loh a khát tawka enfiah a nih tur thu a sawi a, hetia hma an lak reng chuan Champhai lamah chuan bûkna dik an hmang ngei ang.
Chhiarpui hnuhnung ber, 2011 Census aṭanga thlir chuan Champhaiah hian mi 1,25,370 an awm. Hetih lai hi chu district pariat awm lai kha a ni a, mipui tam lamah Champhai hian Aizawl (4,04,054) leh Lunglei (1,54,094)-te chiah a tluk lo. Chutih rualin, Khawzawl, Saitual leh Hnathial district awm hnuah chuan mipui awm dan chu a danglam tawh viau ang.
Kum 2011 chhiarpui aṭangin la teh ta ila, Champhai aiin Aizawla mipui tamna hi a let thum a ni pha a; chhiarkawp dan aṭanga hlir chuan Aizawlah chuan a let thum talin bûkna dik lo hmang an awm dawn tihna a ni.
Aizawl hi Mizoram khawpui a nih avangin sumdawnna hmunpui a ni a, thingtlang hmun hrang hranga mi châkkhai lamna a nih avangin sumdawng pawh an tam. Hei vang hian a lêt thum tih tam ngawt kha a dik dawn lo a; pakla hisap taka thlir chuan 100 an chuang hial ang.
Kristian zaa za inchhal ṭhin Mizote hi zaa zaah kan inchhal ngam tawh lo a, kan sumdawnna hmunah hian Kristiana lang awm bawk mah se, lang lo tam tak an awm ve bawk.
Hei vang hian Legal Metrology Department lam hian mipui hma ngaiin sumdawngte hi an vil uluk a ṭul. Dan ṭha taka lekkawh a nih chuan dik takin sum dawnna kalpui a nih ka ring tlat. Mipuiin an hlawkpui ang a, Mizo anga kan rilru put hmang her dikna kawngah a ṭangkai bawk ang.
- Lalzaidama