Kan khawtlang hruaitu atan eng mi nge ṭha ber ang?

Kan hriat ṭheuh angin kan hma lawkah hian Mizoram chhunga khua/ veng hrang hrangte chuan kum nga chhung atana kan khawtlang min hruaitu tur, Lo­cal Council/ Village Council thlanna chu ram pum huapin kan nei leh dawn a ni. Politicial party hrang hrang leh inde­pendent-a chuh tumte chuan nomination an file fel ta a, campaign pawhin a vanglai a thleng mek bawk.

Duh thlang turin mipui lam pawhin kan rilru kan seng ṭan tawhin a rinawm. Hetiang hunah hian mipuite hian kan zalenna kan hman thiam a ṭul takmeuh a ni. Kan Bible-in "Bumin awm suh u" a tih ang deuh khan mipuite hi tute emaw bum leh tih at kan nih loh nan kan chhia leh ṭha hriatna fim tak nen kan khawtlang hruaitu turah hian eng mi hi nge kan khawtlang hruaitu atan ṭha ber ang tih hi beng sika kan ngaihtuah a, mi dik leh rinawm, pamham lo thleng ngam tura kan in siam a hun takmeuh a ni.

Mi tam tak rilruah Local Council leh Village Council ngaih­pawimawh tawk lohna a awm tlat a, nimahsela a te lo a, a ngaihnep awm hek lo. Kan veng VIP an ni a, a pawimawhzia hre phak loten an ngai tê mai a ni. Kan thlan fuh chuan kan nihlawh a, kan thlan fuh loh chuan veng/ khua dang kan awt ngawih ngawih a, kan changkang mawh a, sum leh paiah an hming a hliau phei chuan khawtlang hruaitute laka rinna nghah ngam chu har ve tak a ni.

Tu pawhin L.C/ V.C ṭha neih kan duh a, chuvangin mi ṭha chu party leh thil dang vangin i thlan hmaih lo ang u. Tichuan, kan vannei dawn a ni mai. Mite nuihzat leh deusawh nih kan duh loh chuan ruihtheih thila fihlim lo, mipat hmeichhiatna laka fihlim lote hi thlan loh tur a ni.

Sum leh pai thuah kan LC/ VC te chu mipui vangtlang rin ngam an ni tur a ni. Sum hi kan damchhan ber a ni lo a, mi fing leh fel, mi chak, mahse suma rinawm lo te ai chuan fing var vak loa lang leh hniam deuh zawka lang, mi pamhamte endawng ngam, mi rinawm leh dikna ṭan ngamte hi thlang ila khawtlangin a ṭhatpui zawk tho tho.

Duhthlang thei tura zalenna kan neih hlutzia te, kan zalenna a dik lo zawnga kan hman chuan kan zavai tan chhiatna a nihzia te hi hria ila, duhthlanna dik kan hman thiam chuan mi vannei kan ni mai dawn a ni.

Party emaw chi leh kuang, vua leh vangin min tibuai suh se. I chhung hnai tak kha mi dik leh ṭha a nih chuan vote mai la, a nih loh chuan vote loh ngam mai hi a finthlak zawk.

Thil ṭha lo tam tak aṭang hian in zir fing ila, kan khawtlang leh keimahni min hruaitu atan tunge ṭha ber ang tih hi tun LC/ VC inthlanah hian kan rilruah lo lian ber teh se.