Sun control bel ka hlau leh ta lo

Thil ho deuh nia lang chanchinbu liana khel hlawh ve tak chu motor-a sun control bel leh bel loh hi a ni. Ka ngaihdan chuan sun control bel hian motor nawmna hi a belhchhah a, a mawi em em a, kan motor-a sun control bel khaptute hi tute nge maw an nih le?

Supreme Court-in a khap kan tih zel dawn chuan Supreme Court khap thil hi Mizoramah hian kan practice tam avangin sun control-ah hi chuan Supreme Court-ah tumahin Mizoram sorkar hi a hêk peih ka ring lova, mark tihṭhat tum fâl deuh khan lo khap tawh lo mai teh u.

Kan VIP motor bang hi en ula a dum leh fur tawh a, anmahni tho hi sun control bel pawtthla hmasatute kha an ni a, an bel dum leh tawh avangin bel dum ve leh tawh ang u. Tin, keini mi vantlangte hian VIP sun control bel hi sawisel tur a ni lova, motor-a an chuang traffic jam vela an lang tlang rul hi a inhmeh lo ve a lawm le. VIP nih ve manah han inkhuh dumin han biru ve hmak se a mawi ve lawm le, anni VIP hlawh tam rual.

Keini âk zat hnih hnuai lam mahin kan motor-a kan chuang mi hmuh tlang theih kan duh lo ang bawk hian VIP pawhin an duh lo. Duh lo ṭheuh ṭheuh chu mahni motor darthlalang bel dum hi chu i phal mai teh ang u. Min pawhthlaktir dawn chuan VIP motor aṭangin ṭan leh law law se, chuti loa rualkhai lo taka hma lak a nih chuan a buai nuai dawnin i hre ve lo maw ka unau?

Mahni motor duh dana chei theih loh tura Supreme Court thu an tih Mizorama khawng taka kenkawh tum ve tlat mai hi kei ka ei lo. Central lam aṭangin politician lar leh thil ti thei zawkten bawngsa khapna ramah min siam an tum a, Mizoramah hi chuan kan duh dan danin i awm teh ang u. Motor-a sun control bel hi ka thlawp a, ka hlau tawh bawk lo, VIP pawhin an bel a, keini kan sorkar mithmuha VIP-te pawh hian kan bel ve dawn a ni lawm ni ka ṭhian pa?