Mizo ṭawng thiam phawt ang
Khawvel changkang zelah sap ṭawng thiam hi a pawimawhin a ṭul hle. Hemi rual hian mahni hnam leh hnam ṭawng hnualsuat khawpa sap leh sap ṭawng ngaihsan erawh changkanna a ni ngai lo.
Mizoah chuan sap ṭawng ngaihsan leh dah sanna hi a liansa reng mai a, a remchang vak loah pawh sap ṭawng han zeh tel hrâm hi changkannaahte kan ngai deuh emaw ni, Mizo ṭawnga thu sawi zo thei lo kan tam ṭhin viau.
Thiamna changkang zelah naupangte pawhin an thil en leh hriatte aṭangin zirtir hran ngai loin sap ṭawng an thiam mai a. Mizo ṭawng zirtir chawp an ngai ta zawk hial. Mizo ṭawng awmzia sap ṭawnga hrilhfiahte an ngai ta. Nu leh pa ṭhenkhat chuan intihtheihna atan tak an hmang emaw ni, sawi nuamte an la ti viau zawk a; kan bo tlang viau e.
Puitling zawk leh thiamna sang tak neiah pawh TV show leh mipuite tana thil pawimawh sawi leh inhrilhna hmunah Mizo ngaihthlak tura sawi na nâ nâ, sap ṭawng nena chawhpawlh kha ropui viau nia ngai pawh kan awm tho mai. Mizo pa tana hriatthiam tluantlin theih loh, sap pa tan pawh hriat kim tak tak theih si lohin an sawi a. Sap ṭawnga thu sawi a ngaihnaah Mizo ṭawng nen an pawlh awm tawp si lo. Eng ang aw phawi puam nalh leh no pawhin sawi se, a dawngsawngtu tur berte'n an hriat thiam fumfe miau loh chuan a ho dêr.
Mizo kan nih chhung chuan Mizo ṭawng hi kan hnam ṭawng a ni reng dawn. Mahni hnam ṭawng thiam lo leh thiam châk loh tlat chu hnam boralna kawng pakhat a ni. Aw phawi nalh takin sap ṭawngin han dak zar zar mah ila, 'anmahni ang' tlukin a thiam tih a ni mai, 'ang' kan ni ringawt, kan ṭawng a ni ngai dawn lo.
Mizo ṭawng thiam, Sap ṭawng pawh thiam nâl bawk hi a hlu. Fate'n Mizo ṭawng an thiam loh hi nu leh pa tan thil zahthlak a ni tih hria ila, zahpui nachang hre teh ang u. Ram leh hnam humhalh kan buaipui chho mek tawh karah; mahni hnam ṭawng ngaihlu lotu chuan a ram pawh a ngaihlu dawn lo. Chutiang mihring chher chhuaktu nu leh pa ni lo hram ang u.
Mahni hnam ṭawng ngei mai hi thiam nâlin ngaihlu hmasa phawt mai ila, hnam chhan hnatlanga kan thawh ve theihna pakhat a ni. Mizo ṭawng thiam leh ngaihhlut hian sap ṭawng leh ṭawng dang kan thiamna tur a dâl reng reng lo.
Kan ṭawng hi a har a nia.
- Lungen Mami