Min lo nghak lawk r’u (Wait! Please)

Mizote’n, "Min lo nghâk lawk rawh/r'u," kan tih ṭhin, Sap ṭawnga "(Please) wait a minute," an tih ṭhin ang deuh hi vaiho hian colloquial-a hmangin, "Êk minit," an ti fo mai bawk a! Hetia an tih hian thil pawimawh tak mai, tihfel zawk ngai an nei tihna a ni, han ti ila, vai chang ni lo, khawvela Adama thlah zawng zawngte hi chuan thil ṭha zawk a thlen nana, ‘Min lo nghak lawk r'u,’ ‘Lawk lawk...’ tih ṭum hi chu kan hring chan chhung hian kan nei vek mai. Kan inbuatsaih lawk chhung kan innghahtir a, min nghah chhuah hnuah chuan nghah man a awm a, thil ṭha zâwk a lo chhuak a, an lawmin an hlim a, keini lam pawh kan lawmin kan hlim ta ṭhin a ni.

Pathian min duan danin, kan thil ei leh intea chakna (nutrition), taksain a hman zawha paih chhuah nan mihringte leh thil nung dangte chu kan inthiar ṭhin a ni. Ṭha taka inthiar thei kan nih hian a lawmawm a, kan hrisel tihna a ni a; kan inthiar zawh hnuah chuan kan awm danah kan pangngai a, kan nuam huai a, hna thawk turin chakna thar kan nei ta tihna pawh a ni ang chu. Bathroom-a mi an inthiar laiin mi â leh, a chhungah mi an awm tih hre lote an nih ngawt loh chuan tu mahin bathroom/washroom-a mi an awm laiin kawngkhar an kik dut dut ngai lo.

Beram vengtu: 100% Kristian ni lo mah ila, Mizoram Kristian ram tia chhiar theihah hian kan Chief Minister Upa Dr Lalduhoma hi beram vengtu angin lo chan ta ila, Mizoram state leh a chhunga cheng Zo fa, Christian-te hian hma sawnna/ changkanna kawnga rual kan ban ve theih nana thlarau leh tih tak zeta a ngaihtuah a, thapui thawha a beih hnuah siam ṭhat ngai laite a hre nasain, in sa thiam (architech)-in in a sa ṭha leh ang hian kan ram hmasawnna (socio, eco-cultural development) ṭhanṭhu tak mai in chu sak ṭhat tuma beiin, Zoram mipui hnenah, "Hetia Zoramin hma sawnna tluantling a neih nana in sakna bungrua/châkkhai ka lak khawm chhung leh ban lian ka phun mek kum khat chhung hi chu khawngaih takin min lo nghak hrâm (lawk) r'u" a ti a; he, ‘Min lo nghak lawk r'u,’ a tih hi Insawhngheh Kum 'The Year of Consolidation'-ah a ngaih theih a. Amaherawhchu, sawrkar sum nei lo sa rochuntu a nih avang erawh hi chuan insawhngheh nana inbuatsaih nan hian, keini ang hetiang lam kawng (stream/subject)-a hriatna nei tlem ngaihdanah chuan, kum 5 pawh insawhngheh nan hian lo mamawh ta ang se la, a inâwm zâwk viauin a lang a ni.

– Dr JT Vanlalngheta